देश विकासका लागि सरकार र राजनीतिक दलहरू चुक्नु हुँदैन् : राष्ट्रपति पौडेल (भिडियो)

फाइल तस्बिर

काठमाडौँ- राष्ट्रपति रामचन्द्र पौडेलले मुलुकको सांस्कृतिक, सामाजिक र आर्थिक विकास गर्न सरकार र राजनीतिक दलहरू चुक्नु नहुने बताएका छन् ।

गणेशमान सिंह तथा जन आन्दोलन सहिद स्मृति शान्ति प्रतिष्ठानले शनिबार काठमाडौँमा आयोजना गरेको गणेशमान सिंह ११० औं जन्म जयन्ती तथा अभिनन्दन कार्यक्रममा राष्ट्रपति पौडेलले संघीय लोकतान्त्रिक गणतान्त्रिक शासनप्रणालीको जगमा समग्रम मुलुकको विकास गर्न सरकार र राजनीतिक दलहरु चुक्नु नहुने बताएका हुन् ।

मुलुकभित्रै भाग्य र भविष्य सुनिश्चित छ भन्ने जनताको चाहनालाई साकार पार्दै भरोषा जगाउन सक्नु अहिलेको आवश्यकता रहेको उनले बताए । उनले मुलुकमा देखिने भ्रष्टाचार, विकृति र विसंगति हटाउन जरुरी रहेको बताए ।

त्यस्तै उनले अवसरबाट वञ्चित, गरीब र पिछडीएका जनताको आवाज र असन्तुष्टि सुनी उनीहरूलाई केन्द्रमा राखेर सरकारका नीति एवम कार्यक्रम तय गरी लागू गर्नुपर्नेमा समेत जोड दिए । नेपालमा लोकतन्त्र स्थापना र पुनस्थापनामा गणेशमान सिंहको योगदान उच्च रहेको उनले बताए ।

उनले पद पाउन पद्धति मिच्ने र आफ्नो स्वार्थपूर्ति गर्न लोकतन्त्रको आधारभूत मूल्य मान्यता कुल्चने प्रवृत्ति लोकतन्त्रको लागि हितकर हुन नसक्ने स्पष्ट पारे ।

कार्यक्रममा राष्ट्रपति पौडेलले नेपालको लोकतान्त्रिक आन्दोलन, मानव अधिकार र स्वतन्त्रताका पक्षमा महत्वपूर्ण योगदान गर्नुहुने मानवअधिकारवादी नेता कपिल श्रेष्ठलाई जनआन्दोलन स्वर्ण पदकबाट सम्मान गरेका थिए ।