कोटहीमाई गाउँपालिकाले किसानलाई विद्युत् निःशुल्क दिने

मर्चवार (रुपन्देही)- रुपन्देहीको कोटहीमाई गाउँपालिकाले कृषि विकासका लागि विद्युत् निःशुल्क दिने योजना अघि बढाएको छ । यस योजनाअन्तर्गत गाउँपालिका भित्रका किसानलाई कृषि प्रयोजनका लागि निःशुल्क विद्युत् आपूर्ति गरिने छ ।

कोटहीमाई गाउँपालिकाका अध्यक्ष बालकृष्ण त्रिपाठीका अनुसार, पहिलो चरणमा वडा नं १, २ र ३ मा तार तथा खम्बा व्यवस्थापन गर्ने कार्य सुरु गरिएको छ । किसानलाई सिँचाइका लागि निःशुल्क विद्युत् उपलब्ध गराउने उद्देश्य रहेको उनको भनाइ छ । 

“यसबाट उत्पादन लागत घट्ने र उत्पादन क्षमता वृद्धि हुने अपेक्षा गरिएको छ”, अध्यक्ष त्रिपाठीले भने, “सिँचाइमा खपत हुने विद्युत् गाउँपालिकाबाट निःशुल्क उपलब्ध गराउँदा किसानको मनोबल बढ्नेछ र खेतीपातीमा धेरै सुधार हुनेछ ।” मर्चवार क्षेत्रमा सिँचाइ अभावले उत्पादनमा कमी आएको थियो ।

प्रमुख प्रशासकीय अधिकृत दिनेश गौडका अनुसार चालु आर्थिक वर्षमा गाउँपालिकाको वडा नं ३, ४ र ५ मा विद्युत् उपलब्ध गराउने कार्य सम्पन्न गर्ने लक्ष्य छ । यसका लागि रु एक करोड ५० लाख  विनियोजन गरिएको छ ।