एनपीएलः जनकपुर बोल्ट्स र सुदूरपश्चिम रोयल्स विजयी

सांकेतिक फोटो

राजधानीमा जारी नेपाल प्रिमियर लिग (एनपिएल) अन्तर्गत जनकपुर बोल्ट्स र सुदूरपश्चिम रोयल्स विजयी भएका छन् । बिहीबार कीर्तिपुरस्थित त्रिवि क्रिकेट मैदानमा भएको खेलमा जनकपुरले पोखरा एभेन्जर्स र सुदूरपश्चिम रोयल्सले काठमाडौँ गुर्खाजलाई पराजित गरेको हो ।

बिहीबारको पहिलो खेलमा जनकपुरले पोखरा एभेन्जर्सलाई ७ विकेटले पराजित गर्दै लगातार तेस्रो जित हासिल गर्यो । १ सय ३९ रनको मध्यम लक्ष्य जनकपुरले १७  दशमलव १ ओभरमा ३ विकेट गुमाएर पूरा गर्यो ।  जनकपुरका लाहिरु मिलन्थाले सर्वाधिक ४५ रन बनाए ।

त्यसअघि टस हारेर पहिले ब्याटिङ गरेको पोखराले निर्धारित २० ओभरमा ७ विकेट गुमाएर १ सय ३८ रनको मध्यम योगफल तयार गरेको थियो । लगातार तीन खेलमा ६ अंकका साथ जनकपुर लिगको शीर्ष स्थानमा छ । पोखराको भने यो लगातार दोस्रो हार हो ।

त्यस्तै बिहीबारको दोस्रो खेलमा सुदूरपश्चिम रोयल्सले काठमाडौं गुर्खाजलाई ७३ रनले पराजित गर्यो । सुदूरपश्चिमले दिएको १ सय ६८ रनको मध्यम लक्ष्य पछ्याएको काठमाडौंले १५ दशमलव ५ ओभरमा अल आउट हुदै ९४ रन मात्र जोड्न सक्यो ।

त्यसअघि टस हारेर पहिले ब्याटिङको निम्तो पाएको सुदूरपश्चिमले निर्धारित २० ओभरमा ६ विकेट गुमाएर १ सय ६७ रनको योगफल तयार गर्यो । सुदूरपश्चिम लगातार दोस्रो जितका साथ दोस्रो स्थानमा उक्लिएको छ । पराजित काठमाडौंको ३ खेलबाट २ अंक भएको छ ।

प्रतियोगिता अन्तर्गत शुक्रबार हुने पहिलो खेलमा कर्णाली याक्स र चितवन राइनोज् तथा दोश्रो खेल लुम्विनी लायन्स र पोखरा एभेन्जर्सबीच हुने क्यानले जनाएको छ ।