जनताका आवाज तटस्थ रुपमा आम नागरिकमा पुर्याउन आग्रह

फाइल फाेटाे

काठमाडौँ - सार्वजनिक सेवा प्रसारण संस्थाका नवनियुक्त कार्यकारी अध्यक्ष डा. महेन्द्र विष्टले जनताका आवाज तटस्थ रुपमा आम नागरिकसम्म पुर्याउनका लागि केन्द्रित हुन आग्रह गरेका छन् ।

रेडियो नेपालको कार्यालयमा बुधबार आयोजित स्वागत कार्यक्रममा उनले रेडियो नेपाल र नेपाल टेलिभिजनलाई राष्ट्रको आवश्यकताका आधारमा एकीकृत गरी सार्वजनिक प्रसारण संस्था बनाइएको भन्दै जनताका आवाज तटस्थ रुपमा आम नागरिकसम्म पुर्याउनका लागि केन्द्रित हुन आग्रह गरेका हुन् ।

उनले समायोजनको प्रक्रिया निकै जटिल संवेदनशील भएकाले विज्ञहरूको सुझावका आधारमा अघि बढाइने धारणा राखे । सार्वजनिक सेवा प्रशारणमा रुपान्तरण हुने क्रममा आउने विभिन्न चुनौतीको सामना गर्दै सबैले आ आफ्नो जिम्मेवारी र दायित्व निर्वाह गर्न उनले आग्रह गरे ।

रेडियो नेपाल र नेपाल टेलिभिजनका प्रमुखहरूले संस्थाको हित हुनेगरी सबैले काम गर्नुपर्नेमा जोड दिएका थिए । कार्यकारी अध्यक्ष डा. विष्टले मंगलबार नै पदभार ग्रहण गरेका थिए । मङ्सिर २८ गते बसेको मन्त्रीपरिषद्को बैठकले उनलाई सार्वजनिक सेवा प्रसारण संस्थाको कार्यकारी अध्यक्षमा नियुक्त गरेको थियो ।