एसएसबीबाट नेपाली युवक कुटिए, नेपाल-भारत सीमामा दिनभर तनाव

काठमाडौँ : रौतहटको मुख्य नाका गौर बैरगनिया मितेरी पुलमा भारतीय एसएसबीले एक नेपाली युवकलाई कुटपिट गरेपछि नेपाल-भारत सीमा सोमबार दिनभर तनावग्रस्त बनेको छ । गौरबाट सीमापारी बैरगनिया जान लागेका गौर नगरपालिका-५ का गौतम दुलाललाई भारतीय एसएसबीले कुटपिट गरेपछिस्थिती तनावग्रस्त बनेको हो ।

कोभिड महामारीका कारण विगत डेढ वर्षदेखि बन्द रहेको गौर बैरगनिया मुख्य सडक बाढीकारण विगत तीन दिनदेखि पैदल आवतजावत गर्न सुरु भएपनि सोमबार बिहानैदेखि भारतीय एसएसबीले बन्द गरेको स्थानीयले बताएका छन् । कोभिडकालदेखि नै गौर बैरगनिया नाका ठप्प रहे पनि सर्वसाधारणहरू चोर बाटो भएर आवतजावत गर्ने गरेका छन् । 

तर, वर्षा र बाढीका कारण छेउछाउमा पानी जमेपछि बाध्यताले मुख्य बाटो रोज्न भारतीय एसएसबीलाई दबाब दिएपछि तीन दिनअघि पैदल आवतजावत गर्न खुल्ला गरिएको थियो । सीमा क्षेत्रमा भारतीय क्षेत्रमा समेत एसएसबीले सोझै बाटो प्रयोग नगरी सर्वसाधारणलाई तल्लो भागबाट आवतजावत गर्न लगाएका थिए ।