तेल चुहावटले दुई लाख टन माटो प्रदूषित गरेको हुनसक्ने रुसको भनाइ

मस्को- यस महिना दक्षिणी रुसको तटमा दुई क्षतिग्रस्त ट्याङ्करबाट फैलिएको तेलले दुई लाख टन माटो प्रदूषित भएको हुनसक्ने रुसका प्राकृतिक स्रोतमन्त्रीले सोमबार बताएका छन् । 

“प्रदूषित माटोको मात्रा दुई लाख टनसम्म पुग्नसक्छ”, अलेक्जान्डर कोज्लोभले टेलिग्राममा ज्वेज्दा च्यानलद्वारा प्रसारण गरिएको बैठकमा भने । 

डिसेम्बर १५ मा दुई रूसी तेल ट्याङ्कर भोल्गोनफ्ट–२१२ र भोल्गोनफ्ट–२३९ केर्च स्ट्रेटमा आँधीबेहरीको चपेटामा परेका थिए । तीमध्ये एउटा डुबेको थियो र अर्को किनारामा पुगेको थियो । 

यो जलडमरूमध्यले दक्षिणी रुसलाई क्रिमियाको युक्रेनी प्रायद्वीपबाट अलग गर्दछ । क्रिमियालाई रुसले सन् २०१४ मा कब्जा गरेको थियो । 

रूसी अधिकारीहरूका अनुसार जहाजहरूमा नौ हजार दुई सय टन इन्धन तेल थियो र त्यसमध्ये करिब ४० प्रतिशत समुद्रमा पोखिएको हुनसक्छ । 

राष्ट्रपति भ्लादिमिर पुटिनले गत हप्ता यसलाई ‘पर्यावरणीय विपत्ति’ भनेका थिए ।

दर्जनौँ किलोमिटरको समुद्र तटमा इन्धन तेल फेला परेको थियो । विशेष गरी अनपाको समुद्री रिसोर्टमा ठूलो क्षति पुगेको थियो । 

स्थानीय अधिकारीहरूद्वारा प्रसारण गरिएका तस्बिरहरूका अनुसार संलग्न क्रिमियाको बन्दरगाह सहर केर्चमा पनि यसको किनारमा इन्धन तेल आइपुगेको देखा परेको छ । 

क्षेत्रीय गभर्नर भेनियामिन कोन्द्रातयेभले सोमबार प्रकाशित गरेको तस्बिरअनुसार सेतो सुरक्षात्मक पहिरनमा स्वयंसेवकहरूले यस क्षेत्रका समुद्र तटहरू सफा गरिरहेका छन् । 

“हिजो राति लगभग सबै कुरा सफा भइसकेको स्वयंसेवकहरूले बताएका छन् तर रातको समयमा छालहरूले फेरि इन्धन तेल जम्मा गरे”, उनले भने । 

स्वयंसेवकहरूले उपचार गरिरहेका तेल लागेका चराहरूका तस्बिरहरू पनि स्थानीय अधिकारीहरूले प्रसारण गरेका छन् ।

तेल चुहावटले १० वटा डल्फिनको पनि मृत्यु भएको हुनसक्ने तर मृत्युको कारण पुष्टि गर्न परीक्षण आवश्यक रहेको विशेषज्ञ डेल्फा केन्द्रले आइतबार बताएको छ । “यो अत्यन्त चिन्ताजनक स्थिति हो”, कृष्ण सागरमा डल्फिनहरूको संरक्षण गर्ने वैज्ञानिक संस्थाले टेलिग्राममा भनेको छ । (एएफपी)