भोलि बस्‍ने भाकामै सकियो कार्यदल बैठक

काठमाडौँ : सत्तारुढ एमाले कार्यदल बैठक कुनै निष्कर्षबिना सकिएको छ । बैठकमा सहभागी वरिष्ठ नेता माधवकुमार नेपाल समूहका कार्यदल सदस्य सुरेन्द्र पाण्डेले छलफल सकारात्मक रहेको र भोलि बस्नेगरी बैठक टुंगिएको जानकारी दिए । ‘आज विषय प्रवेश भयो । छलफल सकारात्मक छ । कुनै निर्णय भइसकेको छैन । भोलि बस्नेगरी बैठक टुंगियो,’ पाण्डेले इकागजसँग भने । 

यसअघि विवादबारे प्रधानमन्त्रीसमेत रहेका अध्यक्ष केपी शर्मा ओली र वरिष्ठ नेता माधवकुमार नेपालले विवादबारे संयुक्त वक्तव्य जारी गर्ने चर्चा थियो । तर, त्यस विषयमा कार्यदल बैठकमा कुनै सहमति नभएको नेता रघुजी पन्तले बताए । ‘संयुक्त वक्तव्यबारे कुनै कुरा उठेन,’ पन्तले बैठकपछि सञ्चारकर्मीहरूसँग भने । 

राष्ट्रिय सभा सदस्य निर्वाचनपछि विघटन गरिएको कार्यदल हिजो ब्युँताइएको थियो । ब्युतिएपछि हिजो बैठक बसेको थियो । आजको बैठक दोस्रो भए पनि विषयमात्रै प्रवेश भएको र बैठक सकारात्मक भएको नेता पाण्डेले बताए ।