भूकम्पका धक्का आइरहेका छन्, सबै सतर्क र सुरक्षित रहनु होला : प्रधानमन्त्री ओली

फाइल तस्बिर ।

काठमाडौँ- प्रधानमन्त्री केपी शर्मा ओलीले भूकम्पबाट सुरक्षित रहन नागरिकलाई आह्वान गरेका छन् ।

केही दिन यतादेखि नेपालमा लगातार भूकम्प गइरहेकाले सुरक्षित हुन प्रधानमन्त्रीले आग्रह गरेका हुन् । 

‘हिजोआज बिभिन्न भागमा साना–ठूला भूकम्पका धक्का आइरहेका छन्, सबै सतर्क रहनु होला, सुरक्षित रहनु होला’, प्रधानमन्त्री ओलीले मंगलबार सामाजिक सञ्जाल फेसबुकमा लेख्दै सो आब्हान गरेका हुन्  ।

मंगलबार बिहानै ६:५१ बजे पनि काठमाडौँलगायत नेपालका विभिन्न भागमा भूकम्पको ठूलो धक्का महसुस भएको छ । नेपाल–चीन सिमाना तिब्बतको दिंगे कान्टी केन्द्रबिन्दु भएर गएको भूकम्पले काठमाडौँसहित दोलखा, सिन्धुपाल्चोक, रामेछापलगायतका क्षेत्रमा ठूलो धक्का महसुस भएको थियो । 

भूकम्पको धक्का कोशी तथा मधेस प्रदेशमा पनि महसुस भएको छ । चीनको तिब्बत तथा भारतको सिक्किममा समेत भूकम्पको धक्का महसुस भएको छ ।  खानी तथा भूगर्भ विभागका अनुसार भूकम्प ७.१ म्याग्निच्युडको गएको प्रारम्भिक रेकर्डले देखाएको छ ।