अवैध मोबाइल सेट नचल्ने

तस्बिर गुगल

काठमाडौँ : नेपाल दुरसञ्चार प्राधिकरणले एमडिएमएस लागू गर्न प्राविधिक काम भइरहेको बताएको छ । प्राधिकरणका अध्यक्ष पुरुषोत्तम खनालले अहिले चलिरहेको मोबाइल फोनलाई निर्वाध चल्न दिने गरी काम भइरहेको जानकारी दिए । साउन महिना मोबाइल प्रयोगकर्ताले आईएमईआई नम्बर दर्ता गराउन समय दिने तयारी गरेको उनकाे भनाइ छ । प्राधिकरणका अध्यक्ष खनालले कमसल, गुणस्तर नभएका र अबैध बाटोबाट आएको अर्थात किनेको मोबाइल नचलाउन आग्रह गरे ।

अहिले मिडियामा आए जस्तो, विभिन्न सामाजिक संजालमा भेटिएको गलत सूचनामा विश्वास नगर्न प्राधिकरणका अध्यक्ष खनालले सचेत गराए । साउन महिनापछि भने आईएमईआई नम्बर दर्ता नभएका मोबाइल सेटले काम गर्न नसक्ने भएकोले दर्ता गर्न अनुरोध गरे । आगामी साउन १ गतेदेखि मोबाईल डिभाईस म्यानेजमेण्ट सिस्टम लागू हुने भएकाले अवैध रुपमा भित्रिएका मोबाईल सेट नचल्ने उनको भनाइ छ । नेपाल सरकारले आगामी वर्षको बजेट सार्वजनिक गर्दा एमडिएमएस लागू गर्ने घोषणा गरेको छ । एमडिएमएस लागू भएपछि आईएमईआई नम्बर दर्ता नभएका मोबाईल सेट चल्दैनन् । त्‍यस्ता मोबाइलमा सिम कार्ड राखे पनि काम गर्दैन । मोबाइल व्यवसायीले एमडिएमएस लागू भएपछि नेपालमा अवैध मोबाइल नै नरहने बताइएको छ ।

मोबाईल फोन आयातकर्ता संघका अध्यक्ष समेत रहेका नेपाल चेम्बर अफ कमर्सका उपाध्यक्ष दिपक कुमार मल्हो‍त्राले एमडिएमएस प्रणाली लागू भएपछि मोबाइल कारोबार पारदर्शी हुने बताए । करिब ४० अर्बको  मोबाइल कारोबारमा १३ अर्बको कारोबार अबैध हुने बताइन्छ ।