जापानी प्रधानमन्त्री इसिबा र अमेरिकी राष्ट्रपति ट्रम्पबीच प्रत्यक्ष शिखर बैठक हुने, के-के छ मुख्य एजेन्डा ?

काठमाडौँ- जापानका प्रधानमन्त्री शिगेरु इसिबा र अमेरिकी राष्ट्रपति डोनाल्ड ट्रम्पबीच पहिलो प्रत्यक्ष शिखर बैठक हुने भएको छ । उक्त बैठक आगामी फेब्रुअरी ७ मा हुने तय भएको छ ।

यो भेटघाटले दुई देशबीचको लामो समयदेखिको गठबन्धनलाई थप सुदृढ पार्ने र स्वतन्त्र तथा खुला इन्डो-प्यासिफिक क्षेत्रको सुनिश्चितताका लागि सहकार्यको नयाँ आयाम खुला गर्ने अपेक्षा गरिएको अन्तर्राष्ट्रिय सञ्चारमाध्यमहरूले जनाएका छ ।

मुख्य एजेन्डाहरू
शिखर बैठकमा जापान-अमेरिका सम्बन्धलाई अझ प्रगाढ बनाउने प्रयास गरिनेछ । प्रधानमन्त्री इसिबाले दुई देशबीचको सम्बन्धलाई दुवै पक्षका राष्ट्रिय हितमा आधारित “विन-विन साझेदारी” को रूपमा प्रस्तुत गर्ने योजना बनाएका छन् ।

त्यस्तै आर्थिक क्षेत्रमा रहेका मुद्दाहरू, जस्तै जापानी कम्पनी निप्पोन स्टिल कर्पोरेशनद्वारा अमेरिकी कम्पनीको अधिग्रहणमा रोक लगाउने विषय पनि छलफल हुने सम्भावना रहेको छ । यो विषय जापानी उद्योग क्षेत्रको चासोको केन्द्रमा रहेको छ ।

इसिबाले यसअघि राष्ट्रपति ट्रम्पको कार्यकाल सुरु हुनुभन्दा अगाडि भेटघाट गर्न प्रयास गरेपनि सफल हुन सकेन । हालै उनले अमेरिकी राष्ट्रपतिसँग “जति सक्दो चाँडो” भेटघाट गर्ने आफ्नो इच्छा सार्वजनिक रूपमा व्यक्त गरेका थिए ।

यो बैठकले केवल सुरक्षा र आर्थिक सहकार्यमा मात्र नभई क्षेत्रीय स्थिरतामा समेत योगदान गर्ने विश्वास व्यक्त गरिएको छ । जापान र अमेरिका दुवै देशका लागि यो बैठक रणनीतिक महत्वको मानिएको छ ।