दिल्ली क्यापिटल्सको मेन्टर बने केभिन पिटरसन

काठमाडौं - इण्डियन प्रिमियर लिग (आइपिएल) फ्रेन्चाइजी दिल्ली क्यापिटल्सले इङल्याण्डका पूर्व कप्तान केभिन पिटरसनलाई २०२५ सिजनको लागि आफ्नो मेन्टर नियुक्त गरेको छ । ४४ वर्षीय पिटरसन पहिलो पटक प्रशिक्षकको भूमिकामा हुनेछन् ।

उनी २००९ देखि २०१४ सम्म आइपिएलमा खेलाडीको रूपमा सहभागी थिए । उनले १७ आईपीएल खेलमा कप्तानी पनि गरिसकेका छन् । उनले दिल्लीबाट आइपिएल समेत खेलेका थिए । 

फ्रान्चाइजले ३ महिना अघि आफ्नो कोचिङ स्टाफ परिवर्तन गरेको थियो । त्यसपछि दिल्लीका मुख्य प्रशिक्षक रिकी पोन्टिङ पञ्जाब किंग्समा सामेल भएका थिए । 

दिल्लीले भारतका पूर्व तीव्र गतिका बलर मुनाफ पटेललाई बलिङ प्रशिक्षक नियुक्त गरिएको थियो भने हेमाङ बदानी टोलीको मुख्य प्रशिक्षक र वेणुगोपाल राव क्रिकेट निर्देशक बनेका थिए ।

दिल्ली क्यापिटल्सको टोली २०२१ देखि आईपीएल प्लेअफमा पुग्न सकेको छैन भने आइपिएल शुरु भएदेखिनै उपाधि जित्न नसकेका अहिलेका चार फ्रेन्चाइजी मध्ये दिल्ली पनि एक हो ।