एमाले मुख्यालय अगाडि स्वर्गद्वारी गुठी पीडितको प्रदर्शन

काठमाडौं  - विभिन्न माग राख्दै आन्दोलनरत स्वर्गद्वारी गुठी पीडित मोही किसान संघर्ष समितिले एमाले मुख्यालय च्यासल नजिक प्रदर्शन गरेका छन् । 

सरकारले आफूहरूसँग गरेको सम्झौता कार्यान्वयन नगरेको भन्दै स्वर्गद्वारी गुठी पीडित मोही किसान संघर्ष समितिले मंगलबार च्यासलमा प्रदर्शन गरेका हुन् । मोही किसानहरूलाई मोही पूर्जा दिनुपर्ने उनीहरूको माग छ । उनीहरूले दुई बुँदे सहमति कायान्वयन गर, मोही हक खोस्न पाइँदैन लगायतका नारा लगाएका थिए ।

स्वर्गद्वारी गुठी पीडित मोही किसान संघर्ष समितिका कोषाध्यक्ष शेर बहादुर चौधरीले पुस्तौपुस्तादेखि भोग चलन गरिरहेको जमिनको स्वामित्व पाउन नसकेको भन्दै आन्दोलन गर्नुपरेको बताए । 

स्वर्गद्वारी आश्रमको एक हजार ३४ बिगाह १७ कट्ठा सात धुर जग्गामध्ये सात सय ५३ बिगाह जग्गामा मोही कायम छ । मोही कायम भएको जग्गाको स्वामित्व आफूहरूले पाउनुपर्ने मोही किसानको माग छ ।