सर्वोच्चको फैसला इतिहासमै एउटा महत्वपूर्ण परिघटनाः अध्यक्ष दाहाल

फाइल तस्‍बिर

काठमाडौं : नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहालले सर्वोच्च अदालतले गरेको फैसला इतिहासमै एउटा महत्वपूर्ण परिघटना भएको बताएका छन्। सर्वोच्च अदालतको फैसला पश्चात प्रतिक्रिया दिँदै अध्यक्ष दाहालले यसलाई नेपाल र नेपाली जनताको जितको संज्ञा दिए । उनले अदालतको फैसलाले संविधान र राष्ट्रको गरिमालाई उँचो राखेको बताए । 

'संविधान, लोकतान्त्रिक मूल्य मान्यताको रक्षा र राष्ट्रिय हितको रक्षा आजको ज्वलन्त आवश्यकता बनेको थियो,' उनले भने, 'सर्वोच्चको फैसलालाई स्वागत गर्दछु ।  पार्टी र गठबन्धनको तर्फबाट अदालत, सम्माननीय प्रधानन्यायाधीश तथा अन्य न्यायाधीशहरूलाई हार्दिक बधाई तथा धन्यवाद भन्न चाहन्छु । उहाँहरूले संविधान र राष्ट्रको गरिमा र न्यायालयको गरिमामयलाई पनि उँचो बनाउनुभयो । पटकपटकको संसद विघटन र पटकपटक संविधानमाथि भएको प्रहारबाट आम नेपाली जनता पनि आजित भएको स्थिति थियो । त्यसकारण यो आम नेपाली जनताको जीतको रूपमा अगाडि आएको मैले देखेको छु । यो इतिहासमै एउटा महत्वपूर्ण परिघटनाका रूपमा भएको छ । इतिहासले यसलाई सम्मान गरिराख्ने छ ।'