संघीयता बलियो बनाउन तीनै तहबीच समन्वय जरुरी : सभामुख घिमिरे

काठमाडौँ- प्रतिनिधिसभाका सभामुख देवराज घिमिरेले संघीयता बलियो बनाउन तीनै तहबीच समन्वय जरुरी रहेको बताएका छन् ।

शनिबार काठमाडौँमा आयोजित सङ्घीयता सबलीकरणमा प्रदेश तथा स्थानीय तहका सवाल बिषयक छलफल कार्यक्रममा सभामुख घिमिरेले संघीयताको मर्म अनुसार तीनै तहलाई क्रियाशिल बनाउदै समन्वयात्मक ढंगले अघि बढ्नुपर्ने जरुरी रहेको बताएका हुन् ।

उनले योजना तर्जुमा र बजेट वितरण संघमा सिमित रहनु संघीयताको मर्म नभएको उल्लेख गरे । संरचनात्मक व्यवस्थापन मात्र ध्यान नदिइ नीति निर्माण, स्रोत परिचालन र जवाफदेहीताको संयोजनका साथ संघीयता सुदृढ बनाउनुपर्ने उनले बताए ।

सभामुख घिमिरेले मुलुक संघीय गणतन्त्रमा प्रवेश गरेपछि प्रदेश तथा स्थानीय तहहरु शासन प्रणालीका मेरुदण्ड हुन् भन्ने कुरामा कुनै प्रश्न नरहेको जिकिर गरे ।  

उनले संघीयताका सवलीकरणका लागि नीतिगत क्षेत्रमा धेरै काम भएपनि कार्यान्वयन गर्ने सन्दर्भमा समस्या देखिएको धारणा राखे ।

उनले निजामती सेवा ऐनको अभावले संघीयता कमजोर बनाएको गुनासो आएको भन्दै यसमा आफ्नो ध्यान गएको बताए । संसदमा छलफलको क्रममा रहेको निजामतीसँगै प्रहरी र विद्यालय शिक्षासँग सम्बन्धित विधेयक शिघ्र टुङ्गाउने प्रयासमा रहेको उनको भनाइ छ ।