महिलाहरुलाई सङ्गीत सीप सिकाउन मादल बजाउने तालिम

म्याग्दी (बेनी)- म्याग्दीको रघुगङ्गा गाउँपालिका–२ साझापानीमा महिलाहरुलाई सङ्गीत सीप सिकाउनका लागि मादल बजाउने तालिम प्रदान गरिएको छ । मौवाफाँट सामुदायिक सिकाइ केन्द्रले वडा नम्बर २ भगवतीमा रहेको आयआर्जन समूहका महिलाहरुका लागि सात दिने मादल बजाउने तालिम प्रदान गरेको हो । 

भगवतीका विभिन्न टोलका ३३ जना महिलाहरुले सहभागिता जनाएको तालिममा सङ्गीत प्रशिक्षक गणेश सुवेदीले व्यवहारिक रुपमा मादल बजाउने सीप सिकाएका केन्द्रका परिचालक दुर्गादेवी भण्डारीले जानकारी दिए । उनका अनुसार मौवाफाँट आयआर्जन समूहका २६ जना महिलाहरुलाई समेत मादल बजाउने तालिम प्रदान गरिएको थियो । 

केन्द्रले नयाँ आयआर्जन समूहलाई मादल समेत उपलब्ध गराउने जनाइएको छ । तालिम समापन समारोहमा बोल्दै गाउँपालिका अध्यक्ष भवबहादुर भण्डारीले गाउँघरमा हुने पूजाआजा, भजनकृतन, रत्यौलीलगायत साँस्कृतिक कार्यक्रमहरुमा सङ्गीत सीप अनिवार्य भएको अवस्थामा महिलाहरुले सिकेको मादल बनाउने सीप उपलब्धिमूलक हुने बताए ।

उनले मौवाफाँटमा सामुदायिक सिकाइ केन्द्रको भवन निर्माण गरेर महिलाहरुको आयआर्जनसँग सम्बन्धित गतिविधिलाई व्यवस्थित गराउने तयारी गरिएको जानकारी दिए ।

कार्यक्रममा रघुगङ्गा गाउँपालिका–२ का वडाध्यक्ष अमृत भण्डारीले महिलाहरुलाई सङ्गीत सीप तालिमले गाउँघरमा हुने सङ्गीतसँग सम्बन्धित कार्यक्रममा सहज हुने बताउँदै आयआर्जनमूलक कार्यक्रममार्फत महिलालाई आत्मनिर्भर बनाउनुपर्नेमा जोड दिनुभयो । मौवाफाँट सामुदायिक सिकाइ केन्द्रले यसअघि वडा नम्बर १ बेग र वडा नम्बर ४ दग्नाममा समेत मुडा बुन्ने तालिम प्रदान गरेको थियो । 

गाउँपालिकाको वडा नम्बर १ देखि ४ सम्म कार्यक्षेत्र रहेको केन्द्रले हरेक वर्ष महिलाहरुको सीप र आयआर्जनसँग सम्बन्धित कार्यक्रमलाई सञ्चालन गर्दै आएको मौवाफाँट सामुदायिक सिकाइ केन्द्र व्यवस्थापन समितिका अध्यक्ष मुक्तिनाथ शर्माले बताए । उनका अनुसार, गाउँपालिकाले चालु आर्थिक वर्षमा आयआर्जन र सीपमूलक तालिमका लागि केन्द्रलाई रु एक लाख ७० हजार बजेट उपलब्ध गराएको छ । 

महिलाहरुको क्षमता विकास र आयआर्जन सुधारसँगै सीप विकासका लागि आगामी वर्षमा सामुदायिक सिकाइ केन्द्रलाई थप व्यवस्थित बनाउने तयारी गरिएको गाउँपालिकाका प्रमुख प्रशासकीय अधिकृत चेतनारायण भण्डारीले जानकारी दिए ।