'ट्रम्पको भन्सार महसुलको जवाफ इयुले अप्रिल अन्त्यसम्ममा दिने'

पेरिस- युरोपेली सङ्घ (इयु) ले संयुक्त राज्य अमेरिकाद्वारा बुधबार घोषणा गरिने नयाँ भन्सार महसुलको जवाफ ‘अप्रिल महिनाको अन्त्यभित्र’ दिने फ्रान्सेली सरकारका प्रवक्ताले मन्त्रिपरिषद्को बैठकपछि बताएका छन् ।

“त्यहाँ दुईवटा जवाफहरू हुनेछन् । पहिलो, अप्रिलको मध्यमा हुनेछ, त्यो स्टिल र एल्युमिनियममा पहिले नै निर्णय गरिएको भन्सार महसुलको प्रतिक्रिया हो”, सरकारी प्रवक्ता सोफी प्रिमासले भने, “त्यसपछि क्षेत्र–क्षेत्र अनुसार विस्तृत अध्ययन हुनेछ र अप्रिलको अन्त्यअघि समन्वित, एकताबद्ध र बलियो तरिकाले युरोपेली निर्णय घोषणा गरिनेछ ।”

फ्रान्सका राष्ट्रपति इमानुएल म्याक्रोनले बुधबार अपराह्न युरोपेली आयोगका प्रमुख उर्सुला भन डेर लेयनसँग कुरा गर्ने प्रिमासले बताए ।

युरोपेली सङ्घ (इयु) को व्यापार नीतिका प्रभारी युरोपेली आयोगले फ्रान्सेली सरकारको टिप्पणीलाई पुष्टि गरेन ।

“जब व्यापार नीतिको कुरा आउँछ फ्रान्स युरोपेली सङ्घको तर्फबाट बोल्दैन । हामी बोल्छौँ”, आयोगका व्यापार प्रवक्ता ओलोफ गिलले ब्रसेल्समा पत्रकारहरूलाई भने ।

भन डेर लेयन युरोपेली सङ्घका नेताहरूसँग सम्पर्कमा रहेको उनको प्रवक्ताले पुष्टि गरेका छन् । “स्पष्ट रूपमा यस महत्त्वपूर्ण विषयमा हामीले विभिन्न नेताहरूको इनपुटसहित वास्तवमै एक समन्वित प्रतिक्रिया पाउन सकौँ भनेर अध्यक्ष युरोपेली सङ्घभर नेताहरूसँग सम्पर्कमा रहनुभएको छ”, प्रवक्ता पाउला पिन्होले एक पत्रकार सम्मेलनमा भने । (एएफपी)