के एलन मस्कले अमेरिकी सरकारको पदबाट छिट्टै राजीनामा दिँदैछन् ?

काठमाडौँ- अमेरिकी राष्ट्रपति डोनाल्ड ट्रम्पले आफ्ना निकट मन्त्रीहरू र सहयोगीहरूसँग गरिएको छलफलमा विश्वका एक नम्बरका अर्बपति एलन मस्कले छिट्टै वर्तमान सरकारमा निर्वाह गरिरहेको पदबाट अलग हुने तयारीमा रहेको बताएका छन् । यो जानकारी अमेरिकी राजनीतिक वेबसाइट पोलिटिकोले तीन जना स्रोतलाई उद्धृत गर्दै सार्वजनिक गरेको हो ।

राष्ट्रपति ट्रम्प र मस्कबीच पछिल्ला दिनहरूमा भएको छलफलमा मस्कले आफ्नो निजी व्यवसायमा पुनः सक्रिय हुने निर्णय गरेको खुलाइएको छ ।

मस्क हाल सरकारको 'सरकारी कार्यक्षमता विभाग (Department of Government Efficiency – DOGE)' को प्रमुखको रूपमा कार्यरत छन्, जहाँ उनले संघीय सरकारका कर्मचारीहरूमा ठूलो कटौती गर्ने र सरकारी प्रणालीलाई सरल बनाउने अभियानको नेतृत्व गरिरहेका छन् ।

DOGE अन्तर्गत मस्कको कार्यकाल १३० दिनको रहेको बताइएको छ, जुन आगामी मे अन्त्यदेखि जुनको प्रारम्भसम्म सकिनेछ। तर, उनले त्यसअघि नै राजीनामा दिने वा नदिने विषयमा भने अझै निश्चित केही नभएको ह्वाइट हाउसले जनाएको छ।

स्रोतका अनुसार, मस्कले DOGE मा तोकिएको काम सम्पन्न नगरेसम्म पद नछाड्ने बताएका छन्। “कसैले उनलाई बाहिर जान बाध्य बनाइरहेका छैनन्,” स्रोतले रोइटर्सलाई जानकारी दिएको छ।

उनले यो जिम्मेवारी राष्ट्रपति ट्रम्पसँग गरिएको संवादमार्फत स्वयंले स्वीकारेको र १३० दिनभित्र सबै काम सम्पन्न गर्ने आश्वासन दिँदै आएको समेत जनाइएको छ। यसैबीच, मस्कका लगानीकर्ता र शेयरधनीहरू भने उनलाई फेरि निजी व्यवसाय—विशेष गरी टेस्ला—मा फर्कन चाहिरहेका छन्।

एलन मस्कले सरकारी कर्मचारी कटौतीजस्ता आक्रामक सुधार कार्यहरू अगाडि सारेका कारण अमेरिका भित्रै आलोचनाको शिकार भइरहेका छन्। रिपब्लिकन पार्टीका सांसदहरू समेत यसले मतदातामा नकारात्मक प्रभाव परेको भन्दै दबाबमा छन्।

यस्तो विवादका बीच मस्ककै नेतृत्वमा रहेको विद्युतीय सवारी साधन कम्पनी टेस्लाको हालै सार्वजनिक गरिएको पहिलो त्रैमासिक (जनवरी–मार्च) नतिजा पनि निराशाजनक देखिएको छ। गत वर्षको सोही अवधिको तुलनामा यस वर्ष टेस्लाको विश्वव्यापी डेलिभरी १३% घटेर ३,३६,६८१ इकाइमा झरेको छ, जुन लगभग ३ वर्षयताकै न्यून स्तर हो।

तर मस्कले सरकारी पदबाट अलग हुने चर्चा चलिरहँदा टेस्लाको सेयर मूल्य करिब ५ प्रतिशतले बढेको छ। प्रारम्भिक कारोबारमा भने डेलिभरीमा आएको गिरावटको असरस्वरूप टेस्लाको सेयर एकैपटक ६% भन्दा बढीले घटेको थियो।