शान्तिपुर्ण आन्दोलन गर्ने अधिकार सबैलाई छः डा. कोइराला

मोरङ- नेपाली कांग्रेसका नेता डा शेखर कोइरालाले अहिलेको  संविधान भित्रै रहेर सबै समस्याको समाधान खोज्नुपर्ने बताएका छन् । मोरङको वुढिगंगा गाउपालिका–१ मा निर्माण गर्न लागिएको वुढिगंगा पार्कको आज शिलान्यास गर्दै उनले संविधानभित्र रहेर शान्तीपुर्ण आन्दोलन गर्ने अधिकार सबैलाई रहेको चर्चा गरे । कोइरालाले कुनै प्रकारको हिंसा, आतंक तोडफोड, आगजनी नेपाली कांग्रेसलाई स्वीकार्य नहुने प्रष्ट पारे ।  नेता कोइरालाले गत शुक्रबार काठमाडौंमा भएको घटनाको निष्पक्ष छानबिन गर्नुपर्नेमा समेत जोड दिए ।

नेपाली जनतालाई विश्वास दिलाउँन छानबिन समिति वनाएर सो घटनाको जति सक्दो चाँडो सरकारले छानबिन गर्नुपर्ने उनको भनाई थियो ।  उनले यो व्यवस्थालाई बलियो र दिगो बनाउन राजनीतिक दलहरू पनि सुध्रनु जरुरी रहेको बताए । उनले अहिलेको अवस्थामा  राजनीतिक दलहरुले आफूलाई सुधार्दै जनताका मन जित्न सक्नुपर्नेमा जोड दिए ।

नेता कोइरालाले नेपाली कांग्रेस र नेकपा एमाले दुई ठूला दल मिलेर सरकार निमार्ण गर्दा संविधान संशोधन, सुशासन, आर्थिक विकास, सुशासन तथा रोजगारी सृजना गर्ने  कुरा गरेपनि त्यसो हुन नसेको वताए । जति सक्दो चाँडो आफुले गरेको प्रतिवद्धता पुरा गर्ने तर्फ दलहरुको ध्यान जानुपर्ने कोइरालाको भनाई थियो । उनले नेपालमा कृषि, जलविद्युत, जडिवुटि तथा पर्यटनको प्रसस्त संभावना रहेकाले त्यस्को उचित सदुपयोग गरेर युवाहरुलाई स्वरोजगार वनाउदै नेपाल नेपाली जनतालाई सुखी र समवृद्ध वनाउन सकिने वताए ।