वीरेन्द्रको वंशनाश हुँदा कपाल खौरिएर १३ दिन शोक मनाएको थिएँ : गगन थापा

काठमाडौँ- नेपाली कांग्रेसका महामन्त्री गगन थापाले राजा वीरेन्द्रको पारिवारिक वंशनाश हुँदा कपाल खौरिएर १३ दिन शोक मनाएको बताएका छन् । नेपाली कांग्रेस बागमती प्रदेशले आयोजना गरेको कार्यक्रममा बोल्दै थापाले मातापिता जिउँदै रहँदा पनि आफुले कपाल खौरेर वीरेन्द्रको वंशनाशमा शोक मनाएको बताएका हुन् ।

‘राजा वीरेन्द्रको वंशनाश हुँदा कपाल खौरिने मै हुँ, १३ दिन शोक मनाएको थिएँ, जुन बेला गिरिजाबाबुले ढुंगामुढा खाइरहनु भएको थियो, राजसंस्थाप्रति त्यस्तो सम्मान थियो’ थापाले भने, ‘तर, अहिले निर्मलनिवासमा हुँदा त काठमाडौँमा यत्रो उत्पात मच्चाउने काम भएको छ, नारायणहिटीमा नै भएको भए त के हुन्थ्यो, कल्पना गर्नु त ।’

नेपाली कांग्रेसले संवैधानिक राजसंस्थाप्रति सदैव सम्मान गरेको तर राजाहरूलाई नपचेको उनले जनाएका छन् । ‘बिपी कोइराला माथी राजद्रोहसहित ७–७ मुद्दा लाग्दा पनि बोकेर हिँड्‌नु भयो, गिरिजाबाबुले ढुंगामुढा खाँदा पनि संवैधानिक राजसंस्था भन्नु भयो तर राजाले के गरे त भने उल्टै कांग्रेसलाई नै दुःख दिने काम गर्‍यो ।’

उनले राजतन्त्र फर्कने कुनै सम्भावना नरहेको भन्दै नेता मन नपरे परिवर्तन गर्न सकिने ५ वर्षे ब्यवस्था छ, सोही व्यवस्थामा टेकेर असल नेताहरू छान्ने कामतर्फ लाग्यौं । ‘कतिसम्म राजाको विरूद्ध किताव लेख्ने मेरै क्षेत्रका नवराज सुवेदीलाई उचालेर पूर्वराजाले उपद्रो मच्चाउन लगाए, योबाटै बुझिन्छ कि राजतन्त्र फर्कियो भने के हुन्छ ?’ उनको प्रश्न थियो ।

गणतन्त्रको विकल्प नभएको भन्दै सबैलाई सामाजिक सञ्जालबाट भए पनि जनचेतना जगाउन उनले आग्रहसमेत गरेका छन् ।