मन्त्रालयमा अझै पुगेनन् दर्ता गर्न फेसबुक, एक्स र इन्स्टाग्राम

काठमाडौँ- सामाजिक सञ्जाल  फेसबुक, एक्स र इन्स्टाग्रामले नेपालमा दर्ता गर्न कुनै चासो नदिएको पाइएको छ । यसअघि मन्त्रालयले चैत ७ गते नेपालमा सञ्चालित फेसबुक,एक्स र इन्स्टाग्रामलाई दर्ता गरेर मात्र सञ्चालनमा ल्याउन सूचना जारी गरेर अनुरोध गरेको थियो ।

मन्त्रालयका प्रवक्ता गजेन्द्र कुमार ठाकुरका अनुसार कुनै पनि सामाजिक सञ्जाल दर्ता गर्न लागि आएका छैनन् । दुई जना मानिस मौखिक रुपमा बुझ्न आएका छन् ।

‘नेपालमा दर्ता गर्न भनेर कुनै पनि सामाजिक सञ्जाल मन्त्रालयमा आएका छैनन्,’  प्रवक्ता ठाकुरले भने,’ कानुन अनुसार दर्ता भएनन् भने नेपालमा फेसबुक लगायतका अन्य सोसल साइट बन्द हुन्छ ।‘

सरकारले जारी गरेको समय अझै केही बाँकी छ । समयावधिमा दर्ता नभएमा सरकारले आवश्यक निर्णय गर्न सक्ने उनले बताए ।

झण्डै दुई साताअघि जारी गरेको सूचनामा ’तोकिएको समयभित्र सूचीरकरण हुन नआउने सामाजिक सञ्जाल प्लेटफर्मलाई निर्दे्शिकाको दफा ३ को उपदफा (७) बमोजिम मन्त्रालयले नेपालभित्र सञ्चालनमा रोक लगाउन सक्‍ने व्‍यहोरा समेत जानकारी गराइन्छ,’ भनिएको छ ।