विराटनगर एमालेमा ओली समूह पत्तासाफ, गिरीको प्यानलै विजयी

विराटनगर- नेकपा एमाले विराटनगर अधिवेशनमा अध्यक्ष केपी ओली समूह बढारिएको छ ।

गएराती भएको निर्वाचनमा ओली समूहका उम्मेदवार रोहित कोइरालालाई पराजित गर्दै बलराम गिरी नवीनको प्यानल नै विजयी भएको हो ।

सो निर्वाचनमा १७३ मतका साथ संस्थापन इत्तरका गिरी १७३ मतका साथ अध्यक्षमा विजयी भएका हुन् भने उनका प्रतिस्पर्धी रोहित कोइरालाले १२१ मतमा सिमित भएका छन् । गिरीलाई संस्थापन इत्तरका विनोद ढकाल समूहले उम्मेदवार बनाएको थियो । 

सदस्यहरू सर्वसम्मत निर्वाचित भए पनि अधिवेशनमा ओली समूह संस्थापन समूहबाट एक जना पनि पदाधिकारीमा निर्वाचित हुन नसकेको विराटनगर एमालेका एक नेताले बताए ।

जसअनुसार उपाध्यक्षमा ढकाल पक्षका सुरज न्यौपाने १४५ मतका साथ विजयी हुँदा ओली समूहका राम पोखरेल भने १३६ मतमा सिमित भएका थिए । सचिवमा विज्ञान चापागाईंले १८३ मत ल्याउँदा ओली समूहका नवराज काफ्लेले १०४ मत पाए ।

उता ओली समूहका उपसचिव उम्मेदवार चन्द्र शेखर विश्वासले ९८ मत ल्याउँदा उनका प्रतिद्वन्द्वी झन्डै दोब्बर अर्थात १७८ मतका साथ हमिद आजाद विजयी भएका थिए ।  

साथै ओली समूहका कला डाँगीले १११ मत मात्रै पाउँदा संस्थापन इत्तरका हिमा मैनाली पोखरेल १६९ मत ल्याएर विजयी भइन् । 

सदस्य भने सर्वसम्मत रूपमा चयन गरिएको थियो । यसअघि मोरङ जिल्ला कमिटीमा पनि ओली समूहका उम्मेदवार पराजित गर्दै ढकाल समुहले वर्चश्व मारेको थियो ।