शिक्षकको आवाज नदबाउ संवाद गरः महामन्त्री थापा

काठमाडौँ- नेपाली कांग्रेसका महामन्त्री गगन कुमार थापाले सरकारसँग शिक्षकको आवाजलाई दमन नगरेर संवादबाट सम्बोधन गर्न माग गरेका छन् । उनले भनेका छन्,’ आन्दोलनरत शिक्षकहरुसँग भएको विगतको सहमतिको आधारमा निर्णय गरेर चाँडोभन्दा चाँडो कक्षाकोठामा फर्कने वातावरण बनाउनमा नै हामी सबैले काम गर्नु पर्ने छ, त्यही गरौं।‘

थापाले विद्यालय शिक्षा ऐनको माग गर्दै शान्तिपूर्ण रूपमा भेला भएका शिक्षकहरू र सुरक्षाकर्मीहरूबीच भएको झडप दुःखद र चिन्ताजनक रहेको उल्लेख गरेका छन् । लोकतान्त्रिक मूल्य र नागरिक अधिकारको रक्षा गर्नु राज्यको पहिलो दायित्व रहेको उनको भनाइ छ ।

उनले शान्तिपूर्ण आन्दोलनमा सहभागी शिक्षकहरू, सुरक्षाकर्मी र पत्रकारहरू घाइते हुनु कुनै पनि हिसाबले उचित हुन नसक्ने तर्क गरेका छन् ।