‘खलनायक २’ मा पल र पुष्प

काठमाडौं : १२ वर्षअघि ‘खलनायक’शीर्षकमा फिल्म बनाएका रोज राणाले सोही नाममा अर्को फिल्म बनाउने घोषणा गरेको लामो समय भइसक्यो । ‘खलनायक २’ शीर्षकमा बन्न लागेको फिल्म रोज राणाले फिल्मको सुटिङ बैशाखमा नै गर्ने तयारी पनि गरेका थिए । तर, बीचैमा कोभिड–१९को महामारी सुरु भएपछि सुटिङ रोकियो । बीचमा भदौमा सुटिङ गर्ने रोजको तयारी थियो तर भदौमा पनि काठमाडौंमा संक्रमण कम नभएपछि सुटिङ गर्ने योजना दोस्रो पटक तुहियो ।

अब भने रोज माघ अन्तिमदेखि सुटिङ गर्ने योजना छन् । तर, रोजले अहिलेसम्म पनि आफूबाहेक अरु कलाकारको टुंगो लगाउन सकेका छैनन् । रोजले एउटा भूमिका आफैंले निर्वाह गर्ने र बाँकी दुई मुख्य भूमिकाका लागि पल शाह र पुष्प खड्कालाई प्रस्ताव गर्ने योजना सुनाए । ‘यो पटक भिलेनको भूमिका म आफैं गर्ने सोचमा छु । फिल्ममा दुई हिरो छन्, यसका लागि भने पल शाह र पुष्प खड्कालाई कुरा गरुँ भन्ने लागिरहेको छ,’ उनले भने, ‘पुष्पसँग त एकचरण कुरा पनि भइसकेको छ । अब केही दिनमै पलसँग पनि कुरा हुन्छ ।’

उनले हिरोसँगै हिरोइन पनि फाइनल गर्ने जानकारी गराए । फिल्मको निर्देशनको जिम्मा भने रोजले गोविन्दसिंह भण्डारीलाई लगाएका छन् । गोविन्दले यसअघि ‘रणवीर’को निर्देशन गरेका थिए ।पहिलो ‘खलनायक’मा राजेश हमाल, निखिल उप्रेति र बिराज भट्टको मुख्य भूमिका थियो । फिल्ममा झरना थापाले लिडिङ लेडीको रुपमा अभिनय गरेकी थिइन् । ऋषि न्यौपानेले निर्देशन गरेको फिल्म उसबेला व्यवसायिक रुपमा सफल मानिएको थियो ।