एनआरएनएलाई उपप्रधानमन्त्री सिंहको बधाई, विदेशमा सिकेको ज्ञान सिपलाई जन्मभूमिको हितमा जोड्न आग्रह

काठमाडौँ- उपप्रधानमन्त्री एवम् शहरी विकास मन्त्री प्रकाशमान सिंहले विदेशमा सिकेको ज्ञान, सिप र प्रविधिलाई आफ्नो जन्मभूमिको हितमा जोड्नका लागि गैरआवासीय नेपाली संघ (एनआरएनए) लाई आग्रह गरेका छन् ।

गैरआवासीय नेपाली संघको नव निर्वाचित कार्यसमितिलाई बधाई ज्ञापन गर्दै उनले अहिले प्रवासमा रहेपनि जन्मभूमिबारे सोच्न आग्रह गरेका हुन् । उनले एनआरएनएभित्र वृहत्तर एकता कायम गरेर अघि बढ्न पनि नयाँ कार्यसमितिलाई सुझाव दिए । 

उपप्रधानमन्त्री सिंहले गैरआवासीय नेपाली संघले नेपालको आर्थीक विकास र समृद्धिका लागि आफ्नो ठाउँबाट सकेको योगदान गरेको चर्चा गर्दै प्रवासमा रहेका आफ्नो दोस्रो पुस्तालाई नेपालसँगको सम्बन्ध नटुटाउनका लागि एनआरएनएले खेलेको भूमिकाको प्रशंसा पनि गरे । उनले सबैले अधिकारको कुरा सँगै जिम्मेवारी बहन गर्नुपर्नेमा पनि जोड दिए । 

उपप्रधानमन्त्री सिंहसँगको भेटमा अध्यक्ष महेश कुमार श्रेष्ठले संसारभर छरिएर रहेका नेपालीहरुलाई एकतावद्ध गरेर आफ्नो कार्यसमिति अघि बढ्ने बताए । आइतबार सम्पन्न एनआरएनएको एकता महाधिवेशनबाट श्रेष्ठ नेतृत्वमा सर्वसम्मत नयाँ कार्यसमिति चयन भएको थियो । एनआरएनएको नवनिर्वाचित कार्यसमितिले शहरी विकास मन्त्रालय पुगेर उपप्रधानमन्त्री सिंहसँग भेट गरेको हो ।