कतारबाट वैवाहिक जबरजस्ती करणी मुद्दाका फरार अभियुक्त पक्राउ

काठमाडौं- वैवाहिक जबरजस्ती करणी मुद्दामा इन्टरपोलको रेड नोटिसमार्फत खोजीमा रहेका फरार अभियुक्त समसुदिन अंसारीलाई कतारबाट पक्राउ गरिएको छ ।

पर्सा जिल्ला वीरगंज महानगरपालिका–३१ बेलवाप्रसौनीका अंसारीलाई एनसीबी कतार दोहाको समन्वयमा कतारमा पक्राउ गरी बिहीबार नेपाल फर्काइएको हो । इन्टरपोलको महासचिवालयले नेपाल प्रहरीको अनुरोधमा २०२५ अप्रिल १ मा अंसारीविरुद्ध रेड नोटिस जारी गरेको थियो ।

उनलाई सम्बन्धित मुद्दामा कारबाही अघि बढाउन जिल्ला प्रहरी कार्यालय पर्सा पठाइएको इन्टरपोल शाखा, नेपाल प्रहरी प्रधान कार्यालयले जनाएको छ ।

अंसारी वैवाहिक जबरजस्ती करणी कसूरमा संलग्न रहेको आरोपमा लामो समयदेखि फरार थिए । उनलाई अन्तर्राष्ट्रियस्तरमा खोजी गर्न इन्टरपोलमार्फत प्रक्रिया अघि बढाइएको थियो ।