सप्तरीमा एक वर्षमा एक हजार जना फरार अभियुक्त पक्राउ

जनकपुरधाम :  चालू आर्थिक वर्ष ०७७ ७८ मा सप्तरी प्रहरीले एक हजार भन्दा बढी फरार अभियुक्तलाई पक्राउ गरेको छ ।  अदालतबाट फैसला भई फरार रहेकाहरुलाई फौसला कार्यान्वयन गराउने क्रममा एक हजार १ सय ४९ जनालाई पक्राउ गरिएको जिल्ला प्रहरी कार्यालय सप्तरीले जनाएको छ ।

प्रहरी प्रवक्ता प्रहरी नायव उपरीक्षक माधव प्रसाद काफ्लेले एक विज्ञप्ति जारी गरी पक्राउ परेकाहरुबाट १ करोड १९ लाख ५४ हजार ८ सय १६ रुपैया राजश्व असुल गरिएको र तिनीहरुबाट २ सय ४२ वर्ष ५ दिन कैद भूक्तान गराइने जनाएको छ ।

प्रवक्ता काफ्लेका अनुसार फैज्दारी मुद्दाका २ सय १ जना र देवानी मुद्दाका ९ सय ४८ जना अदालतबाट सजाय पाएर फरार भएका थिए । यस्तै चालु आर्थिक वर्षको १२ महिनामा भन्सार छलि गरेर ल्याएको ३ करोड १७ लाख ५९ हजार १ सय ७६ मुल्य बराबरको अवैध किराना सामान, लत्ताकपडाहरु, सवारी साधन, मदिराजन्य, विद्यूतीय सामाग्री लगायतका सामानहरु बरामद गरिएको प्रवक्ता काफ्लेले बताए । 

उक्त तस्करीमा संलग्न १ सय २४ जनालाई पक्राउ गरी कारबाही समेत गरिएको उनले जानकारी दिएका छन ।