सानाको विमानस्थलमा इजरायलको आक्रमण

काठमाडौँ- इजरायली युद्धक विमानहरूले बुधवार यमनको सानाको मुख्य विमानस्थल र हुथी सेनासँग सम्बन्धित धेरै विमानहरूलाई प्रहार गरेको इजरायली सेनाले जनाएको छ ।

इजरायली रक्षामन्त्री इजरायल काट्जले छुट्टै विज्ञप्तिमा आक्रमणले हुथी सेनाले प्रयोग गरेको अन्तिम विमानलाई ध्वस्त पारेको बताएका छन् । यो आक्रमण इजरायलले अपरेशन गोल्डेन ज्वेल भनिने अभियानको एक हिस्सा थियो ।

जुन अभियान इजरायलमा थप आक्रमण गर्ने हुथीहरूको क्षमतालाई कमजोर पार्ने उद्देश्यले गरिएको काट्जले बताए । साना अन्तर्राष्ट्रिय विमानस्थलका हुथी महानिर्देशक खालेद अल–शैफले इजरायली हवाई आक्रमणबाट यमनको राष्ट्रिय यमेनिया एयरलाइन कम्पनीको चौथो विमान ध्वस्त भएको बताए ।

उत्तरी यमनको धेरैजसो भाग नियन्त्रण गर्ने हुथीहरूले नोभेम्बर २०२३ देखि इजरायललाई लक्षित गर्दै आएका छन् । जसलाई उनीहरूले प्यालेस्टिनीहरूसँगको ऐक्यवद्धताको कार्य भन्छन् । समूहले इजरायलले आफ्नो सैन्य अपरेशन र गाजाको नाकाबन्दी समाप्त गरेमा आक्रमणहरू बन्द गर्ने बताएको छ । सिन्ह्वा