'युक्रेन र रूस सम्भावित वार्ताअघि युद्धविराम चाहन्छन्'

किभ- अर्को हप्ता इस्तानबुलमा रुस र युक्रेन बीचको सम्भावित दोस्रो चरणको प्रत्यक्ष वार्ताअघि किभको भ्रमण गर्नुभएका टर्कीका विदेशमन्त्रीले शुक्रबार दुवै पक्षले युद्धविराम चाहेको बताएका छन् । 

किभ र मस्को दुवैसँग सम्बन्ध कायम राख्न प्रयास गरेको नाटो सदस्य टर्की तीन वर्षभन्दा बढी समयदेखि चलिरहेको युद्ध अन्त्य गर्न सम्झौताका लागि अमेरिकी राष्ट्रपति डोनाल्ड ट्रम्पको दबाबमा मुख्य मध्यस्थकर्ता बनेको छ ।

रुसले सोमबार आयोजना गर्ने प्रस्ताव गरेको वार्तामा प्रतिनिधिमण्डल पठाउने कि नपठाउने भन्नेबारे किभले अझै पुष्टि गर्न सकेको छैन ।

सबैभन्दा पहिला रुसले शान्तिका लागि रोडम्यापको आफ्नो दृष्टिकोण साझा गरोस् भन्ने युक्रेनले चाहेको छ । एउटा तथाकथित ‘ज्ञापनपत्र’ जुन मस्कोले अर्को वार्तामा युक्रेनी प्रतिनिधिमण्डललाई व्यक्तिगत रूपमा मात्र हस्तान्तरण गर्ने बताएको छ ।

“वार्ता सुरु हुँदै जाँदा यो मुद्दाले अझ आशावादी मोड लिन थालेको मैले देखेको छु । दुवै पक्ष युद्धविराम चाहन्छन् । कसैले पनि युद्धविराम नचाहेको भनेको छैन”, समाचार एजेन्सी अनादोलुका अनुसार विदेशमन्त्री हाकान फिदानले उहाँलाई किभ लिएर गइरहेको ट्रेनमा भने ।

फिदानले यस साताको सुरुमा मस्कोमा रूसी राष्ट्रपति भ्लादिमिर पुटिनसँग वार्ता गरेका थिए ।

शुक्रबार किभ आइपुगेपछि उहाँले युक्रेनी विदेशमन्त्री एन्ड्री सिबिगासँग भेट गर्नुभयो र मारिएका सैनिकहरूको स्मारक स्थलको भ्रमण गरे ।

उनले भोलिपल्ट युक्रेनी राष्ट्रपति भोलोदिमर जेलेन्स्कीलाई भेट्ने अपेक्षा गरिएको थियो ।

युक्रेनले दुई महिनाभन्दा बढी समयदेखि रुसलाई पूर्ण, बिना शर्त र तत्काल ३० दिनको युद्धविराममा सहमत हुन आह्वान गर्दै आएको छ । यो विचार पहिलो पटक ट्रम्पले प्रस्ताव गरेका थिए ।

वासिङ्टन र युरोपको दबाबका बावजुद पुटिनले ती आह्वानलाई बारम्बार अस्वीकार गर्नुभएको छ भने रूसी सेनाले पूर्वी युक्रेनमा आफ्ना आक्रमणहरू तीव्र पारेको छ ।

उहाँले वार्ताको परिणाम स्वरूप युद्धविराम सम्भव भएको तर त्यो वार्ताले युद्धको ‘मूल कारण’ मा ध्यान केन्द्रित गर्नुपर्ने बताएका छन् ।

मस्कोले सामान्यतया युक्रेनको सेनालाई सीमित गर्ने, उसलाई नाटोमा सामेल हुन प्रतिबन्ध लगाउने, विशाल क्षेत्रीय छुटहरू र जेलेन्स्कीलाई अपदस्थ गर्ने जस्ता व्यापक मागहरूको मिश्रणलाई जनाउन त्यो भाषा प्रयोग गर्दछ । (एएफपी)