किन दिए कार्तिकले राजीनामा ?

कोलकाता : इन्डियन प्रिमियर लिग (आईपीएल) को कोलकाता नाइट राइडर्सका कप्तान रहेका दिनेश कार्तिकले टीमको नेतृत्व छाड्ने अनुमान प्रतियोगिता सुरु हुनु अगाबैको हो । तर उनले गत शुक्रबार कप्तानीबाट राजीनामा दिए । उनको ठाउँ लिन आइपुगे इयोन मोर्गान ।

कोलकाताले प्रेस विज्ञप्ती जारी गर्दै कार्तिकबारेमा भनेको छ, ‘कार्तिकले आफ्नो ब्याटिङमा ध्यान दिनका लागी कप्तानी त्याग्ने इच्छा व्यक्त गरे । त्यसो हुँदा टीमप्रतिको उनको योगदान अझ बलियो हुने उनको धारणा थियो ।’ तर कोलकताबाटै प्रकाशित हुने दि टेलिग्राफ अखबारका अनुसार कार्तिकले कप्तानी छाड्नुमा उनले झेल्नु परेको दबाब रहेको जनाएको छ । शुरुवाती खेलहरुमा राम्रोसँग रन बनाउन नसकेपछि उनको आलोचना हुँदै आएको थियो । थप आलोचना सहनु नपरोस भनेर कार्तिकले राजीनामा दिएको टेलिग्राफले जनाएको छ ।

‘टीम व्यवस्थापनले पनि कार्तिकले कप्तानका रुपमा राम्रो गर्न नसकिरहेको ठानेको थियो । उनले राम्रो लयमा खेल्न नसकिरहेको र त्यसले उनको कप्तानी क्षमतामै असर गरिरहेकाले परिवर्तन गर्न आवश्यक ठानियो । आईपीएल फ्रेन्चाइज लिग हो । यसमा रिजल्ट राम्रो नआए कप्तान आलोचित बनिहाल्छन्,’ टेलिग्राफले आफ्नो स्रोतलाई उदृत गर्दै लेखेको छ ।

टीमभित्रकै कतिपयले प्रमुख प्रशिक्षक ब्रेनडोन म्याककुलमले ब्याट्सम्यानका पोजिसनबारेमा राम्रो निर्णय लिन नसक्नु र उनको कार्तिकसँगको संयोजन कमजोर हुनुलाई पनि दोष दिएका छन् । पछिल्लो खेलपछि नै कार्तिकले राजीनामा दिने मनासाय बनाएको बताइएको छ । टीम बैठकमा उनले कप्तानका रुपमा आफ्नो राम्रो र खराब दुबै खालका क्षणहरु रहेको तर आफु अब खराब दिनहरु बढुन भन्नेमा नपुगेको भन्दै राजीनामा दिने संकेत गरेका थिए । (एजेन्सी)