एमाले कर्णाली प्रदेश कमिटीको अभियानः सङ्गठन चलाउन ‘थैली अभियान’

वीरेन्द्रनगर (सुर्खेत)- नेपाल कम्युनिष्ट पार्टी (एमाले) सम्बद्ध अखिल नेपाल महिला सङ्घ कर्णाली प्रदेश कमिटीले सङ्गठन चलाउन ‘थैली अभियान’ सुरु गरेको छ । पार्टी तथा जनवर्गीय सङ्गठन सशक्तीकरण एवं सुदृढीकरणका लागि आर्थिक रुपमा सबल तथा आत्मनिर्भर हुनुपर्ने महसुस गरी थैली अभियान सुरु गरेको अनेमसङ्घ कर्णालीले स्पष्ट गरेको छ ।

अनेमसङ्घ कर्णाली प्रदेश कमिटीका अध्यक्ष पद्मा खड्काका अनुसार आर्थिक अभावका कारण सङ्गठन सञ्चालनमा देखिएको कठिनाइलाई सामना गर्न सुरु गरिएको अभियान फलदायी एवं उपलब्धिमूलक भएको छ । थैली अभियानको औपचारिक सुरुआत नेकपा (एमाले) कर्णाली प्रदेशका पूर्वअध्यक्ष गुलाबजङ्ग शाह र पूर्वप्रदेश इन्चार्ज लेखराज भट्टबाट भएको हो ।

पार्टी कमिटीको २०८० असोज ९ गते सम्पन्न दोस्रो बैठकमा नेताद्वयले थैलीमा हजार÷हजार रुपैयाँ राखेर अभियान शुभारम्भ गर्नुभएको अध्यक्ष खड्काले जानकारी दिनुभयो । त्यसपछि खाजा खाएर फिर्ता भएको रकम थैलीमा राख्ने क्रमले निरन्तरता पाएको छ ।

 अध्यक्ष खड्का भन्नुहुन्छ, “सुरुमा सानो लाग्थ्यो पाँच रुपैयाँ, १० रुपैयाँ तर नियमितता, प्रतिबद्धता र सामूहिक प्रयासले थैली अभियान आर्थिक व्यवस्थापनको आधार बनेको छ ।”

 थैली अभियानको अभ्यास सरल देखिन्छ । खाजा खाँदा फिर्ता भएको पैसा जम्मा गर्नु, तर यसको पछाडि गहिरो सोच, सङ्गठनप्रतिको प्रतिबद्धता र आत्मनिर्भर बन्ने प्रयास लुकेको छ । उहाँले थप्नभयो, “हाम्रो उद्देश्य प्रस्ट छ ।

सशक्त सङ्गठन निर्माण, आर्थिक आत्मनिर्भरता र महिला नेत्रीहरूको एकतामा आधारित आन्दोलनको सुदृढीकरण ।” उहाँले भन्नुभयो, “हामीले देख्यौँ कि सहयोगीहातहरू टाढा छैनन्, रकम हाम्रो खल्तीमै छ । सङ्घीयता आयो, महिलाको प्रतिनिधित्वसहित नेतृत्वले स्थान पायो, तर आर्थिक स्रोत कमजोर रहेसम्म सङ्गठन बलियो हुँदैन भन्ने बुझेर हामी आफैँले बाटो खोल्यौँ र थैली अभियान सुरु ग¥यौँ ।”

 सङ्गठन चलाउन आर्थिक चुनौती बढ्दै गएपछि अनेमसङ्घ कर्णाली प्रदेशकी अध्यक्ष खड्काले देख्नुभएको थैली अभियान अहिले सशक्त बन्दै गएको छ । अध्यक्ष खड्का भन्नुहुन्छ, “हाम्रो अभियान भनेको समस्या देखाएर होइन, समाधान खोजेर अगाडि बढ्ने हो । थैली अभियान त्यसैको एउटा ज्वलन्त उदाहरण हो ।”

उहाँले थप्नुभयो, ‘‘थैलीमा जम्मा हुने प्रत्येक रुपैयाँको मूल्य केवल पैसामा मात्र तुलना गर्न मिल्दैन, त्यो त विश्वास, त्याग र सङ्गठनप्रतिको प्रेम र समपर्ण हो ।’’

अहिले अनेमसङ्घ कर्णालीमा प्रदेशका १० वटै जिल्लाबाट प्रतिनिधित्व हुने ५४ सदस्यीय कमिटी छ । ती सबै सदस्यहरूले खाजाको फिर्ता रकम नियमित रूपमा थैलीमा हालिरहेका छन् । पहिलो पटकको थैली सङ्कलनका क्रममा १५ हजार रुपैयाँ जम्मा भएको थियो । त्यसको निरन्तरतापछि हालसम्म ६० हजार रुपैयाँ सङ्कलन भइसकेको अध्यक्ष खड्काले जानकारी दिनुभयो । उहाँले भन्नुभयो, ‘‘महिलाका हातमा परेको थैली आज सङ्गठन सशक्तीकरणको बलियो हतियार बनेको छ । सङ्घको बैठक, तालिम, जनचेतनालगायतका कार्यक्रम सञ्चालन गर्दा लगानी गर्ने स्रोतका रूपमा थैलीको प्रयोग गर्दै आइरहेका छौँ ।” यसले अनेमसङ्घभित्र आर्थिक अनुशासनमात्रै होइन, समान उत्तरदायित्वको संस्कार पनि विकास भइरहेको छ ।

मुलुकको विकासजस्तै सङ्गठनको विकास पनि आफैँबाट सुरु गर्नुपर्ने अध्यक्ष खड्काको भनाइ छ । थैली अभियानबाट सङ्कलित रकक कोषाध्यक्षको जिम्मामा छ । तर, अब छिट्टै बैङ्क खाता सञ्चालन गरी, लेखापरीक्षण प्रणालीमार्फत पारदर्शी रुपमा कोषको व्यवस्थापन गरिने सङ्घले स्पष्ट गरेको छ ।

“हामी रकम जम्मा मात्रै गरिरहेका छैनौँ, त्यो रकम पारदर्शी ढङ्गले चलाउने प्रतिबद्धता पनि हाम्रो अभियानकै हिस्सा हो,” अध्यक्ष खड्का बताउनुहुन्छ । सङ्घले आर्थिक अनुशासन कायम गर्न पदाधिकारीहरूबाट १०० रुपैयाँ र सदस्यहरूबाट ५० रुपैयाँ ‘लेवी’ पनि सङ्कलन गर्नेगरेको छ । यस्तै, अनेमसङ्घले २६१ वटा टोल कमिटीहरू पनि गठन गरिसकेका छ ।

हालसम्म कर्णाली प्रदेशमा ३० हजार सदस्यता वितरण गरिएको छ, जसमध्ये सात हजार सदस्य औपचारिकरूपमा आबद्ध भइसकेका छन् । अध्यक्ष खड्काका अनुसार सङ्गठनको लक्ष्य २० हजार सक्रिय सदस्य बनाउने र प्रदेशस्तरीय सम्मेलन आयोजना गर्ने रहेको छ । उहाँले अब सङ्घको आफ्नै मुखपत्र प्रकाशन गर्ने योजना अघि बढेको र त्यसबाट विज्ञापन सङ्कलन गरी आर्थिक स्रोतको विविधीकरण गर्ने सोच बनाइएको बताउनुभयो ।

अध्यक्ष खड्काले भन्नुभयो, “कर्णालीजस्तो भौगोलिक हिसावले दुर्गम र पछि परेको, आर्थिक एवं शैक्षिक रुपमा कमजोर प्रदेशमा पार्टी सङ्गठन सञ्चालन गर्नु सजिलो छैन । अझ महिलाको नेतृत्वमा राजनीतिक सङ्गठन चलाउनु त थप चुनौतीपूर्ण छ । तर अनेमसङ्घ कर्णालीको यो अभियान अरु सामाजिक, राजनीतिक सङ्घसंस्थाका लागि भने अनुसरणयोग्य हुने विश्वास लिएकी छु । थोरै रकमको निरन्तर बचतले ठूलो परिवर्तन सम्भव छ भन्ने उदाहरण थैली अभियानले दिएको छ ।