मातृभाषा संरक्षणमा चूनौति भएकाले आवश्यक नीति बनाउनुपर्छः सभामुख घिमिरे

प्रतिनिधिसभाका सभामुख देवराज घिमिरेले नेपालका बिभिन्न जातजाती राष्ट्रको पहिचान भएको बताएका छन् ।

शुक्रबार ललितपुरमा दोस्रो अन्तर्राष्ट्रिय मातृभाषा पत्रकारिता सम्मेलनको उद्घाटन गर्दै सभामुख घिमिरेले राजनीतिक परिवर्तनपछि छोटो समयमा नै राष्ट्रको पहिचान जातीको रुपबाट स्थापीत गर्न सफल भएको बताएका हुन् ।

उनले विभिन्न जातजातीका मातृभाषा संरक्षणमा चूनौति देखापरेकाले यसको संरक्षणका लागि आवश्यक नीति बनाउनुपर्ने धारणा राखे । अन्तर्राष्ट्रिय सम्मेलनबाट तयार हुने महत्वपूर्ण दस्ताबेज मातृभाषाको संरक्षण गर्दै राष्ट्रलाई बलियो बनाउने सन्दर्भमा उपयोगी हुने उनले बताए ।

सभामुख घिमरेले देशका १२४ जातजातिका साथै लोपोन्मुखको संरक्षणका लागि काम भइरहेको भन्दै यसलाई प्रभावकारी बनाउनुपर्नेमा जोड दिए । सभामुख घिमिरेले सूचनाको हक, वाक स्वतन्त्रताको हकका साथै प्रेसलाई व्यवहारिक बनाउने सन्दर्भमा आएका कानूनलाई व्यवहारिक रुप दिनुपर्ने उल्लेख गरे।