४ लाख नेपाली छन् कतारमा

काठमाडौँ- कतारमा करिब चार लाख नेपाली कार्यरत रहेको कतारस्थित नेपाली दूतावासले जनाएको छ । इरानको हमलापछि कतारका केही प्रमुख बजार क्षेत्रहरू बन्द गरिएको छ ।

कतारस्थित नेपाली दूतावासले त्यहाँ रहेका नेपालीलाई सतर्क रहन भन्दै सूचना जारी गरेको छ । सोमबार इरानले कतारमा रहेको अमेरिकी सैन्य अड्डामा सोमबार हवाई हमला गरेपछि नेपाली दूतावासले यस्तो सूचना जारी गरेको हो ।

'वर्तमान परिस्थितिलाई मध्यनजर गर्दै कतारमा रहेका नेपाली दाजुभाइ दिदीबहिनीहरूलाई सतर्क रहन र यथास्थानमै रहन आग्रह गर्दछौँ' जारी सूचनामा भनिएको छ । 

'कृपया शान्तपूर्वक रहन र कतार सरकारको आधिकारिक सूचना, र निर्देशन पालना गर्न अनुरोध गर्दछौँ' सूचनामा भनिएको छ 'नेपाली राजदूतावास, दोहा कतारमा रहनुभएका सबै नेपाली दाजुभाइ दिदीबहिनीहरूका सदैव साथमा रहेको व्यहोरा समेत अवगत गराउन चाहन्छौँ ।'

इजरायल र इरान द्वन्द्वबीच अमेरिकाले शनिबार इरानतर्फ आक्रमण गरेपछि इरानले जवाफी हमला गरेको हो ।

यसैबीच नेपालबाट कतार जाने सबै उडान बन्द गरिएको छ ।

नेपालबाट कतार जाने कतार एअरवेज, नेपाल एअरलाइन्स, हिमालयन एअरलाइन्स लगायतका कुनै पनि व्यावसायिक उडानहरू बन्द भएका छन् । उक्त उडानहरू अर्को सूचना जारी नभएसम्मका लागि बन्द गरिएको छ ।

उडान बन्द भएपछि नेपालबाट वैदेशिक रोजगारीका लागि जान लागेका अधिकांश यात्रुहरू अलपत्र परेका छन् ।