लामिछानेलाई अन्याय नहोस भनेर निरन्तर पहल गरिरहेको छुः अध्यक्ष प्रचण्ड

नेकपा माओवादी केन्द्र र नेकपा एकीकृत समाजवादीका शीर्ष नेताहरुबीच पछिल्लो राजनीतिक घटनाक्रममा छलफल भएको छ । 

मंगलबार माओवादी संसदीय दलको कार्यालय सिंहदरबारमा दुई दलबीच पछिल्लो राजनीतिक घटनाक्रम, भिजिट भिसा प्रकरणमा छानबिन गर्न बनेको समिति, समाजवादी मोर्चा लगाएतका बिषयमा छलफल भएको नेताहरुले जनाएका छन् ।

छलफलपछि माओवादी अध्यक्ष पुष्पकमल दाहाल प्रचण्डले दुई दलबीचको सम्बन्ध, सदनको परिस्थीतिको समिक्षा, समाजवादी मोर्चालाई अघि बढाउने लगाएतका बिषयमा सामान्य छलफल भएको बताए । उनले दुई बुँदे सहमति अनुसार भिजिट भिसा प्रकरणको छानबिन गर्न समिति बनाउनु सकारात्मक भएको उल्लेख गरे ।

प्रचण्डले रास्वपा र रवि लामिछानेलाई अन्याय नहोस भनेर आफूले निरन्तर पहल गरिरहेकोले रास्वपाले त्यसलाई बुझ्ने जिकिर गरे ।

छलफलमा माओवादी अध्यक्ष प्रचण्ड, वरिष्ठ उपाध्यक्ष नारायणकाजी श्रेष्ठ, महासचिव देव गुरुङ, पम्फा भुसाल , नेकपा एकीकृत समाजवादीका अध्यक्ष माधव नेपाल, वरिष्ठ उपाध्यक्ष राजेन्द्र पाण्डे, महासचिव घनश्याम भुसाल लगाएत सहभागी थिए ।