कालीकोटका नौवटै पालिकाको बजेट करिब चार अर्ब

काठमाडौँ- कालीकोटका नौवटै स्थानीय तहले पहिलो पटक असार १० को समय सीमाभित्र नीति कार्यक्रम तथा बजेट सार्वजनिक गरेका छन् । तीन नगरपालिका र छ गाउँपालिका रहेको कालीकोटका नौवटै स्थानीय तहले आर्थिक वर्ष २०८२/०८३ का लागि कूल रु तीन अर्ब ७५ करोड ७१ लाख ९१ हजार ३२९ बराबरको बजेट सार्वजनिक गरेका हुन् ।

विगतमा आधाजसो स्थानीय तहको बजेट समय सीमा कटेपछि आउने गरेकामा सुधार गर्दै सबै स्थानीय तहले असार १० गतेको समय सीमाभित्र बजेट प्रस्तुत गरेका छन् । यहाँका नौ स्थानीय तहमध्ये चार स्थानीय तहले सोमबारसम्म गाउँ तथा नगरसभा सम्पन्न गरी सकेकामा थप पाँचले मङ्गलबार बजेट सार्वजनिक गरेको जिल्ला समन्वय समितिका प्रवक्ता अजय बमले जानकारी दिए । ‘यसअघि विभिन्न कारण सबै स्थानीय तहको बजेट असार १० सम्म नआउने समस्या थियो’, उनले भने, ‘यस पटक सबैले असार १० को ‘डेटलाइन मिट’ गरेका छन् ।’ जिल्लामै सबैभन्दा बढी रु ७० करोड १४ लाख नौ हजार ७१० को बजेट विनियोजन गरेको तिलागुफा नगरपालिकाले विद्यालय गाभ्ने, सबै बस्तीमा भरपर्दो सडक पुर्‍याउने, जैविक उत्पादनमा जोड दिने कार्यक्रम ल्याएको उपप्रमुख महेन्द्रबहादुर शाहीले बताए

स्थानीय सरकारको जिम्मेवारी ‘मिसन रोजगारी’ भन्ने नाराका साथ यहाँको नरहरिनाथ गाउँपालिकाले रु ५१ करोड ८३ लाख ८० हजार ५०० को बजेट ल्याएको छ । पालिकाले पहिलो पटक मावि तहमा विद्यालय नर्स कार्यक्रम ल्याएको पालिका अध्यक्ष नगेन्द्रबहादुर विष्टले जानकारी दिए । यही असार ६ गते गाउँसभा आयोजना गरेको पचाल झरना गाउँपालिका अध्यक्ष देवराज शाहीले बताए । उनका अनुसार पालिकाले रु ४३ करोड ८४ लाख ३९ हजार ३५२ को बजेट ल्याएको छ ।

त्यस्तै शिक्षा र स्वास्थ्यलाई पहिलो प्राथमिकतामा राख्दै रास्कोट नगरपालिकाले असार ८ गते नगरसभाको आयोजना गर्दै रु ४७ करोड २२ लाख ८२ हजार ५१० को बजेट सार्वजनिक गरेको नगर प्रमुख धर्मराज शाहीले बताए । खाँडाचक्र नगरपालिकाको रु ५३ करोड ५५ लाख ५५ हजार ९२० बजेट प्रस्तुत गर्दै उपप्रमुख गणेशबहादुर शाहीले विगतका कार्यक्रमलाई निरन्तरता दिएको जानकारी दिए । 

त्यस्तै विपद् पीडितका लागि सहयोग गर्ने योजनासहित सान्नी त्रिवेणी गाउँपालिकाले रु ४१ करोड ९२ लाख ६२ हजार ४१ को बजेट ल्याएको उपाध्यक्ष पार्वती सिंह सञ्ज्यालले बताइन् । पलाता गाउँपालिकाले रु ४८ करोड २३ लाख ३२ हजार ८४६ बजेट ल्याएको छ भने शुभकालिका गाउँपालिकाले रु ४६ करोड २० लाख ५० हजार ४०० र महाबै गाउँपालिका रु ३५ करोड ८७ लाख ४७ हजार ९६६ बजेट सार्वजनिक गरेका छन् ।