एलजी नेपालले सुरु गर्‍यो 'इफेक्सनेट इन्टेलिजेन्स' नयाँ युगको सुरुवात

एलजी नेपालले आफ्नो विश्वव्यापी नवप्रवर्तनको अभियान 'इफेक्सनेट इन्टेलिजेन्स'लाई नेपालका लागि विशेष प्रदर्शनीमार्फत प्रस्तुत गर्न लागेको छ । दुईदिने यो विशेष प्रदर्शनी कार्यक्रम भोलि शुक्रबार डिलरहरूका लागि र पर्सि शनिबार सर्वसाधारणका लागि आयोजना हुने भएको हो ।

सिंगापुर र मलेसियामा सफलतापूर्वक सम्पन्न भइसकेको यो अभियान अब नेपालमा पनि सुरु हुने भएको हो । यसले भावनात्मक रूपमा मानिसलाई बुझ्ने र ख्याल गर्ने नयाँ युगको आर्टिफिसियल इन्टेलिजेन्सको सुरुवात दर्शाउँछ ।

कम्पनीका अनुसार कार्यक्रममा सहभागीहरूले एलजीको नयाँ पुस्ताको एआई इन्नोभेसन्स प्रत्यक्ष रूपमा अनुभव गर्न पाउनेछन्, जसले केवल सेवा गर्ने मात्र होइन, बुझ्ने र ख्याल गर्ने उद्देश्य राख्दछ । 'इफेक्सनेट इन्टेलिजेन्स' केवल प्रोडक्टहरूको प्रदर्शन मात्र नभई, प्रविधि र मानवबीचको सम्बन्धमा क्रान्तिकारी परिवर्तन ल्याउने एलजीको दृष्टिकोण हो । यसले उत्तरदायित्व, सम्बन्ध र विश्वासलाई केन्द्रमा राख्दै प्रयोगकर्तामैत्री भविष्यतर्फको यात्रा प्रस्तुत गर्ने कम्पनीको भनाइ छ ।

नेपाली बजारमा चार दशक लामो सफल यात्रालाई सम्मान गर्दै एलजी र चौधरी ग्रुपको साझेदारीमा आयोजित यो कार्यक्रम एउटा ऐतिहासिक उपलब्धि हुने विश्वास गरिएको छ ।

चौधरी ग्रुपका मार्केटिङ प्रमुख गौरव हमालले भने, 'यो हाम्रो लागि निकै गर्वको क्षण हो । एलजीसँग हाम्रो सहकार्य गोल्ड स्टारको समयमा सुरु भएको हो । दशकौँसम्म फैलिएको हाम्रो सम्बन्धले नेपाली घरघरमा विश्वस्तरीय प्रविधि ल्याएको छ । अब 'इफेक्सनेट इन्टेलिजेन्स'मार्फत हामी त्यस्तो भविष्यमा पाइला टेक्दै छौँ, जहाँ प्रविधि अझ मानवीय, अझ बौद्धिक र अझ प्रभावकारी बन्नेछ ।'

एलजी र सीजीबीचको सम्बन्धले विश्वास, नवप्रवर्तन र प्रयोगकर्ता मैत्री डिजाइनका आधारमा नेपालमा नेतृत्व कायम गर्दै आएको छ । आगामी प्रदर्शनीले प्रविधिको मानवीय भविष्य कस्तो देखिन्छ भन्ने झलक दिने कम्पनीको भनाइ छ ।

प्रदर्शनी सर्वसाधारणका लागि ललितपुरको द प्लाजामा पर्सि शनिबार बिहान ११:०० बजेदेखि साँझ ५:०० बजेसम्म आयोजना हुने जानकारी कम्पनीले दिएको छ ।