दुर्गम गाउँबस्तीमा इन्टरनेटको पहुँच विस्तार

म्याग्दी (बेनी)- म्याग्दीको रघुगङ्गा गाउँपालिकाको दुर्गम  ग्रामीण बस्तीमा इन्टरनेटको पहुँच विस्तार भएको छ । सञ्चारको सहज पहुँच नपुगेका गाउँ बस्तीमा तीव्र गतिको फाइबर इन्टरनेट सेवा पुगेपछि स्थानीयवासी खुसी भएका छन् । चालु आर्थिक वर्षमा रघुगङ्गा गाउँपालिका– ६ पाखापानीको रायखोर, मूलपानी र उल्लेरीलगायत बस्तीमा इन्टरनेटको सुविधा पुगेको हो । 

यसवर्ष पालिकाबाट प्राप्त भएको बजेटबाट वडा कार्यालयले रु सात लाख बजेटको इन्टरनेट विस्तार योजना छनोट गरेको थियो । समुदायको थप रु सात लाखको साझेदारीमा रायखोर, मूलपानी क्षेत्रका ५८ घरधुरीमा इन्टरनेटको पहुँच पुर्‍याइएको उपभोक्ता समितिका अध्यक्ष ओमकुमार शेरपुजा मगरले जानकारी दिए । 

इन्टरनेट विस्तारका लागि गाउँसम्म करिब साढे सात किलोमिटर दूरीमा प्राइम नेटवर्क प्रालिले मुख्य फाइबर तार तानेपछि पालिका र समुदायको साझेदारीमा इन्टरनेट वितरण तार र इन्टरनेटका मेसिन तथा उपकरण खरिद गरिएको उनले बताए । वडा कार्यालयले तीन वर्षदेखि सुरु गरेको ग्रामीणबस्तीमा इन्टरनेट विस्तार अभियानले यसवर्ष पूर्णता पाएको छ । 

पहिलो र दोस्रो वर्षमा रु ६ लाख ५० हजारका दरले बजेट विनियोजन भएको र यसवर्ष रु सात लाख बजेट गरी कूल २० लाख बजेट खर्चेर वडाका टोलबस्तीमा इन्टरनेटको पहुँच र सुविधा विस्तार गरिएको वडाअध्यक्ष मनकुमार शेरपुजा मगरले जानकारी दिए । यस वडाका सबै बस्ती र टोल इन्टरनेटको पहुँचमा पुगेको उनले बताए । 

“कतिपय टोलबस्तीमा मोबाइल फोनको पनि सहज पहुँच थिएन, हामीले आधुनिक सूचना प्रविधिको पहुँचलाई टोल टोलमा पुर्‍याउन अभियान थालेका थियौँ, यस वर्ष वडाभरी नै इन्टरनेटको पहुँच पुर्‍याउने योजनाले पूर्णता पाएको छ । सरकारी बजेटकै हाराहारीमा समुदायकोसमेत साझेदारीले योजनाले पूर्णता पाउन सकेको हो”, वडाध्यक्ष शेरपुजा मगरले भने । उनका अनुसार पाखापानीका विभिन्न टोलबस्तीका करिब तीन सय घरमा इन्टरनेट जडान भइसकेको छ । 

सेवा प्रदायक कम्पनीका म्याग्दी शाखा प्रमुख गोविन्द पौडेलले हरेक घरमा ५० एमबिपिएसदेखि तीन सय एमविपिएस क्षमताको इन्टेरनेट सुविधा पुगेको बताए । भौगोलिक विकटता र वनजङ्गलका कारण ग्रामीण भेगमा इन्टरनेट विस्तार गर्न जटिल रहेको अवस्थामा कम्पनीले ग्रामीण क्षेत्रलाई प्राथमिकता दिएर सेवा विस्तार गर्ने योजनामा सहकार्य गरेको उनको भनाइ छ ।

इन्टरनेटको क्षमताअनुसार वार्षिक रु १० हजारदेखि रु १३ हजार ७०० सम्म शुल्क निर्धारण गरिएको छ । रघुगङ्गा गाउँपालिका–८ मासमेत यसवर्ष इन्टरनेट विस्तार भएको छ । मोबाइल फोनको समेत सहज पहुँच नभएका गाउँबस्तीमा इन्टरनेट पुगेपछि स्थानीयबासीमा खुसीयाली छाएको छ ।

चालु आवमा गाउँपालिकाबाट विनियोजन भएको रु नौ लाख बजेट र समुदायको रु नौ लाखलागत साभेदारीमा यस वडाको घ्यासीखर्क, चौरखानी, दुवाढी, ढाँड, पात्लेखर्क, खरिबोट बस्तीका एक सय ३४ घरमा इन्टरनेट जडान गरिएको इन्टरनेट विस्तार उपभोक्ता समितिका अध्यक्ष केशव छन्त्यालले जानकारी दिए । 

बिहुकोट इन्टरनेट कम्पनीले गाउँसम्म फाइबर नेटको तार तानेपछि गाउँपालिका र समुदायको साझेदारीमा वितरण तार विस्तार र इन्टरनेटका उपकरण खरिद गरिएको थियो । विद्यालय र स्वास्थ्य संस्थामा समेत इन्टरनेट जडान गरिएको छ ।

विद्यालयमा इन्टरनेट सुविधा पुगेपछि प्रविधिमैत्री शिक्षण सिकाइका लागि सहज हुने अपेक्षा गरिएको छ । यस्तै, कार्यालय प्रयोजन र व्यक्तिगत काममा मोबाइल डाटाबाट इन्टरनेटको प्रयोग गर्नुपर्ने बाध्यता र झन्झटसमेत हटेको छ । रासस