संसद् भवनमा ड्रोन खसालेको आरोपमा पाँच जना पक्राउ

काठमाडौँ- संघीय संसद् भवनमा ड्रोन खसालेको आरोपमा प्रहरीले पाँच जनालाई नियन्त्रणमा लिएको छ । जिल्ला प्रहरी परिसर काठमाडौँका प्रवक्ता एवं प्रहरी उपरीक्षक अपिलराज बोहराका अनुसार काठमाडौँ महानगरपालिका–१० नयाँ बानेश्वर, सुवर्णमार्गस्थित टेकस्पायर कलेजका प्राध्यापक एवं कोर्स को-अर्डिनेटर विजयबाबु रेग्मी, सोही कलेजका विद्यार्थीहरू समन महर्जन, सुजल काजी श्रेष्ठ, समिप खतिवडा र अफ्ताव रेजा रहेका छन् । 

उनले भने, “संघीय संसद् भवनमा ड्रोन खसालेको आरोपमा पाँच जनालाई नियन्त्रणमा लिई  जिल्ला प्रशासन कार्यालय काठमाडौँमा उपस्थित गराइएको छ ।”

यही असार २४ गते बिहान ९:३० बजे संघीय संसद भवन (उडान निषेधित क्षेत्र) को दक्षिणतर्फको छतमा एक थान ड्रोन फेला परेको र टेकस्पायर कलेजको लोकेसनबाट सो ड्रोनले उडान सुरु गरेको देखिएको प्रहरीले जनाएको छ । कलेजका प्रधानाध्यापक लक्ष्मण पोख्रेलले प्राध्यापक एवं विद्यार्थीहरूलाई उक्त ड्रोन निर्माण गरी परीक्षण गर्न भनी यही असार १३ गते लिखित रूपमा सेमेस्टर कार्य  दिइएको भन्ने बुझिएको प्रहरी प्रवक्ता बोहराले बताएका छन् ।