सामुदायिक विकास परियोजनासम्बन्धी समझदारीपत्रमा हस्ताक्षर

काठमाडौँ- नेपालमा शिक्षा तथा स्वास्थ्य क्षेत्रमा भारत सरकारको अनुदान सहयोगमा कार्यान्वयन हुने पाँच वटा उच्च प्रभाव सामुदायिक विकास परियोजनाको समझदारीपत्रमा हस्ताक्षर भएको छ ।

सो परियोजनालाई अघि बढाउन सङ्घीय मामिला तथा सामान्य प्रशासन मन्त्रालय, सङ्घीय सरकारका परियोजना कार्यान्वयन निकाय तथा काठमाडौँस्थित भारतीय राजदूतावासबीच आज समझदारी पत्रमा हस्ताक्षर सम्पन्न भएको हो । यी परियोजनाहरूको कूल अनुमानित लागत रु ३९ करोड रहेको भारतीय दूतावासले जनाएको छ ।

यी पाँच परियोजना धनुषाको बटेश्वर गाउँपालिका बटेश्वर-३ मा जनशक्ति माध्यमिक विद्यालय भवन, पर्साको पोखरिया नगरपालिकामा महोवनी पद्म माध्यमिक विद्यालय, अछामको मेल्लेख गाउँपालिकामा वासुकी माध्यमिक विद्यालय, बाराको प्रसौनी गाउँपालिका-२ मा बेंगा साह माध्यमिक विद्यालयको भवन, छात्राबास तथा पुस्तकालय तथा मनाङको नासोँ गाउँपालिका-५ मा पाँच श्ययाको अस्पताल भवन निर्माण रहेका छन् ।

नगरपालिका र गाउँपालिकासहित सङ्घीय सरकारका स्थानीय निकाय तथा संस्थामार्फत यी परियोजनाको कार्यान्वयन गरिने दूतावासले जनाएको छ । यी संरचना निर्माणले नेपाली जनतालाई गुणस्तरीय शिक्षा र स्वास्थ्य सुविधा प्रदान गर्न मद्दत गर्नेछ । 

सन् २००३ यता भारत सरकारले आज समझदारी पत्रमा हस्ताक्षर भएका पाँच वटा परियोजनासहित नेपालमा पाँच सय ७९ वटा उच्च प्रभाव सामुदायिक विकास परियोजना अघि बढाएको छ । यीमध्ये नेपालका सातवटै प्रदेशभरि स्वास्थ्य, शिक्षा, खानेपानी, कनेक्टिभिटी, सरसफाइ क्षेत्रमा र सार्वजनिक उपयोगी वस्तुको निर्माणमा चार सय ९६ परियोजना सम्पन्न भइसकेका छन् । बाँकी परियोजना विभिन्न चरणमा निर्माणाधीन छन् ।