अर्लि बर्ड अफर सहित साइमेक्स इन्क. द्वारा नेपालमा नयाँ अत्याधुनिक बीवाइडी सिलायन सेभेन सार्वजनिक

नेपालमा बीवाईडी अटो इन्डस्ट्रीको आधिकारिक वितरक साइमेक्स इन्क प्रालिले बहुप्रतीक्षित बीवाईडी सिलायन– ७ (सेभेन) बिहीबार सार्वजनिक गरेको छ । सिलायन– ७ देशको प्रिमियम इलेक्ट्रिक एसयूभी सेगमेन्टमा एक नयाँ साहसी प्रतिस्पर्धीको रूपमा आएको कम्पनीले जनाएको छ ।

कार्यक्रममा विशेष अतिथिका रूपमा उपस्थित नेपालका लागि चिनियाँ राजदूत महामहिम चेन सोङले दिगो विकासको क्षेत्रमा चीन र नेपालको बढ्दो सहकार्यलाई उल्लेख गर्दै प्रशंसा गरे । साथै, उनले बीवाईडी सिलायन– ७ जस्ता प्रविधिसम्पन्न विद्युतीय सवारीसाधनहरूको प्रवेशले नेपालको विद्युतीय रूपान्तरणलाई अझ गति दिने विश्वास व्यक्त गरे ।

साइमेक्स इन्कका प्रमुख कार्यकारी अधिकृत साहिल श्रेष्ठले भने, 'बीवाईडी सिलायन– ७ मा नवीनतम विद्युतीय प्रविधि, प्रिमियमस्तरको कम्फर्ट र नेपालका लागि तयार पारिएको इन्जिनियरिङबाट संयोजन गरिएको छ । १०० किलोवाट भेरियन्ट र आकर्षक प्रारम्भिक मूल्यसहित नेपाली बजारमा अर्को एक महत्वपूर्ण मोडेल प्रस्तुत गर्न पाउँदा गर्व महसुस गरेका छौँ । दिगो यातायातको माग बढ्दै गर्दा सिलायन– ७ ले सार्थकता र आकर्षण दुवैका साथ विद्युतीय सवारीप्रतिको हाम्रो प्रतिबद्धतालाई अझ मजबुत बनाउनेछ ।'

विशेषता र मूल्य

• नेपालका लागि नयाँ पिँढीको विद्युतीय एसयूभी हो । यो गाडी अब नेपालमा १०० किलोवाटको रियर-ह्वील ड्राइभ कन्फिगरेसनमा उपलब्ध छ, जुन उच्च प्रदर्शन, आकर्षक डिजाइन र लामो दूरी क्षमताका लागि इन्जिनियरिङ गरिएको छ । यो मोडेल बीवाईडीको ओसिएन सिरिजको हिस्सा हो ।
• नेपालमा बीवाईडी सिलायन– ७ को खुद्रा मूल्य ७४.९९ लाख रुपैयाँ तोकिएको छ । तर प्रारम्भिक अर्ली बर्ड मूल्य ७२.९९ लाख (सीमित अवधिका लागि) मा उपलब्ध गराइने कम्पनीको भनाइ छ ।
• प्रारम्भिक चरणमा बुकिङ गर्ने ग्राहकहरूले विशेष वारेन्टी प्याकेजको सुविधा पनि पाइने ।
• ब्लेड ब्याट्री: १० वर्ष / २,००,००० किलोमिटर ।
• इलेक्ट्रिक मोटर: १० वर्ष / १,८७,५०० किलोमिटर ।
• पूरै सवारीसाधन (एलएभी साथ): ७ वर्ष / १,५०,००० किलोमिटर । यसमा भने सर्तहरू लागू हुने बताइएको छ ।

नवीनतम प्रविधि र विशेषताहरू

यस गाडीमा सेल-टु-बडी (सीटीबी) इन्टिग्रेसनसहितको ब्लेड ब्याट्री रहेको छ । बीवाईडीको अत्याधुनिक ई-प्ल्याटफर्म ३.० मा निर्मित 'सिलायन– ७' क्रान्तिकारी ब्लेड ब्याट्रीमा जडित भएकाले विश्वव्यापी रूपमा यसको सुरक्षा, टिकाउपन र नयाँ प्रविधिका लागि चर्चित छ । सेल-टु-बडी (सीटीबी) इन्टिग्रेसनमार्फत ब्याट्री सवारीसाधनको संरचनाको अभिन्न भाग बन्छ, जसले इन्टेरियर र गाडीको सन्तुलन राम्रो बनाउँछ ।

यस गाडीमा रहेको ब्याट्रीको क्षमता ७१.८ किलोवाट/आवर र डब्लूएलटीपी रेन्ज ४४० किलोमिटर छ ।

सिलायन– ७ मा १०० किलोवाट क्षमताको इलेक्ट्रिक मोटर रहेको छ, जुन ३८० न्युटन मिटर टर्क उत्पादन गर्न सक्षम छ र विश्व कीर्तिमान राख्ने २३,००० आरपीएममा घुम्ने क्षमता राख्छ । यो उच्च गति मोटरले तीव्र एक्सेलेरेसन सुनिश्चित गर्दै बीवाईडीको इलेक्ट्रिक पावरट्रेन नवप्रवर्तनमा नेतृत्वलाई मजबुत बनाउँछ ।