गृहले निलम्बन गर्‍यो एसपीद्वय बस्‍नेत र यादव तथा निरीक्षक चौरसियालाई

काठमाडौँ : गृह मन्त्रालयले आचरण विपरीत काम गरेका आरोपमा नेपाल प्रहरीका तीन अधिकृतलाई निलम्बन गरेको छ । निलम्बनमा पर्नेमा  प्रहरी उपरीक्षक (एसपी) विमल बस्‍नेत र रामेश्‍वरप्रसाद यादव तथा प्रहरी निरीक्षक मेघराजप्रसाद चौरसिया छन् । मंगलबार गृह सचिवस्तरीय निर्णयबाट उनीहरूलाई निलम्बन गर्ने निर्णय भएको प्रहरी प्रवक्ता वसन्तबहादुर कुँवरले जानकारी दिए । 

प्रवक्ता  कुँवरले जारी गरेको सूचनामा घटनाका विषयमा अहिले छानबिन भइरहेको र कसुरको मात्रा हेरी कारवाही हुने उल्लेख छ । तीनै जनामाथि विगतमा कर्णाली प्रदेश ट्राफिक प्रहरी कार्यालयमा रहँदा आचरण विपरीत र गैरव्यावसायिक कार्य गरेको आरोप छ ।

 अहिले यादव महानगरीय ट्राफिक प्रहरी महाशाखामा प्रवक्ताका रुपमा, बस्‍नेत महानगरीय प्रहरी कार्यालय रानीपोखरीमा र चौरासिया इलाका प्रहरी कार्यालय कपिलकोट सिन्धुलीमा कार्यरत छन् ।  मन्त्रालयका अनुसार उनीहरूले प्रहरी संगठनको छबीमा आँच आउने एवं अन्य प्रहरी कर्मचारीलाई असर पुर्‍याउने कार्य गरेको प्रारम्भिक छानबिन पाइएको छ । उनीहरूले आफूलाई सुम्पिएको जिम्मेवारी र दायित्व पूरा नगरेको पाइएको प्रहरी प्रवक्ता कुवरले बताए ।  

मन्त्रालयले प्रहरी नियमावली,२०७१ विपरीत आचरण, व्यवहार तथा गैरव्यावसायिक कार्य गरेको पुष्टि हुन आएकाले थप जाँचबुझ एवं छानबिन गर्न प्रहरी नियमावली, २०७१ को नियम ११५ को (४) बमोजिम सचिवस्तरको निर्णयअनुसार बढीमा ६ महिनाका लागि निलम्बन गरिएको जनाएको छ । केही दिनअघि मात्रै मन्त्रालयले इलाका प्रहरी कार्यालय मालाखेती कैलालीका प्रहरी नायब उपरीक्षक भरतराज चौधरीलाई पनि निलम्बन गरेको थियो ।