तातोपानी सडक नखुल्दा सरकारसँग आक्रोशित छन् व्यवसायी, नाका नखुले दसैँ-तिहार महंगिने निश्चित

काठमाडौँ- दसैँ आउन करिब डेढ महिना बाँकी रहँदा सिन्धुपाल्चोकस्थित तातोपानी नाकाको सडक अवस्था लथालिङ्ग छ । वर्षाले भोटेकोशी गाउँपालिका-२ कोदारीमा एक साताअघि गएको पहिरो अझै खुलाउन सकिएको छैन ।

नेपाल-चीन मितेरी पुलबाट करिब २ किमि नेपालतर्फको बाटोमा पहिरो गएपछि सडक खुलाउन अझै सकिएको छैन । माथि वस्ति भएकाले वस्ति जोगाएर सडक खुलाउन पनि समस्या भइरहेको छ ।

पहिरोले सडक अवरूद्ध हुँदा व्यापारी मात्रै होइनन् त्यहाँबाट कैलाश मानसरोवर जाने यात्रु पनि समस्यामा परेका छन् ।

अवरूद्ध सडक खुलाउन व्यापारीहरूले सरकारलाई ध्यानाकर्षण गराउँदा पनि सरकारले चासो नदिएको उनीहरूको आरोप छ ।

बाढीले रसुवाको केरुङ नाका बन्द भएपछि धेरै व्यवसायीहरू समस्यामा परेका छन् ।

सडक अवरूद्ध हुँदा दसैँको सामान बोकेका झन्डै ६ सय कन्टेनर नेपाल आउन सकेका छैन भने सीमा क्षेत्र आएका कन्टेनर पनि अलपत्र अवस्थामा छन् । सडक निर्माण नहुँदा नजिकिदै गरेको चार्डपर्वको लागि समयमा सामान नआउँदा बजार महङ्गो हुने निश्चित जस्तै छ ।

सिन्धुपाल्चोक उद्योग वाणिज्य सघका अध्यक्ष बुद्धराज बस्नेतका अनुसार नेपालीहरूको चाडपर्व लक्षित सामान लोड भएर (पारी) चीनमा नै अड्किएका छन् । 'संघीय सरकारले पनि त्यति चासो देखाएको छैन । विपद्‌मा गर्ने काम राज्यले गरेन । बिम तेर्स्याएर बाटो खुलाउन सकिने अवस्था थियो त्यो पनि राज्यले गरन' बस्नेतले भने 'नाका खुलेन् भने पारी लोड भएर बसेका स्याउ र लसुन कुहिन्छ । यसले व्यापारीहरूलाई करोडौँ घाटा लाग्छ ।'

उनका अनुसार दसैंका सामान जति सबै अड्किएका छन् । लत्ता कपडा पनि लोड भएर बसको छ, तर नेपालमा कन्टेनर राख्ने ठाउँ नभएर ल्याउन नसकिएको उनले बताए । करिब ५ सयदेखि ६ सय वटा कन्टेनर चीन रोकिएक छन् । एक कन्टेनरको भाडा दैनिक १० रूपैयाँ चिनियाँ व्यवसायी संघलाई तिरेर राखिएको उनले बताए ।

'चीनको खासा, न्यालम र केरूङको सामान सबै नेपाली कन्टेनरमा लोड भइसकेका छन्' उनले भने ' लासामा भएको कन्टेन भने लोड भएको छैन ।'

नेपाल ट्रक कन्टेनर ढुवानी सेवा प्रालिका अध्यक्ष अर्जुन सापकोटाका अनुसार सरकारलाई तातोपानी नाका र यहाँको समस्याबारे जानकारी गराउँदा पनि चासो नदिएको बताउँछन् ।

वाणिज्य सघका महासचिव रामचन्द्र पराजुलीका अनुसार रसुवा बन्द भएपछि तातोपानी नाकाबाट व्यावसाय गर्न सुझाए पनि तातोपानीमा सडकको थप समस्या आइपरेको छ ।  

संघीय सरकार र ठेकेदार कम्पनीको कारण तातोपानीका स्थानीय र व्यावसायीहरूले हरेक वर्ष दु:ख भोटेकोसी गाउँपालिका २ का वडाध्यक्ष कुमार श्रेष्ठले बताए ।

'ठेक्का लगाएको चार वर्ष भयो तर अहिलेसम्म काम भएको छैन । यसले गर्दा समस्या भइरहेको छ' सडक डिभिजन कार्यालय चरिकोटका इन्जिनियर सुरज महर्जनले भने 'अब जसरी पनि सडक खुलाउनुपर्छ बन्द गर्न हुँदैन ।'