प्रधानमन्त्रीलाई देउवाको प्रश्‍न : पौडेललाई किन समाएको ?

काठमाडौँ : नेपाली कांग्रेसका सभापति शेरबहादुर देउवाले पार्टीका वरिष्ठ नेता रामचन्द्र पौडेललाई तनहुँबाट प्रहरीले नियन्त्रणमा लिएकोबारे प्रधानमन्त्री केपी शर्मा ओलीसँग आपत्ति जनाएका छन् । सभापति देउवाले प्रधानमन्त्री ओलीलाई टेलिफोन गरेर आपत्ति जनाएका हुन् । 

प्रधानमन्त्री ओलीले पौडेलकै सुरक्षाका लागि नियन्त्रणमा लिइएको जानकारी प्रहरी प्रशासनले गराएको देउवालाई बताएको स्वकीय सचिव भानु देउवाले जानकारी दिए । 'सभापति ज्यूले प्रधानमन्त्रीलाई टेलिफोन गरेर किन नियन्त्रणमा लिएको भनेर सोध्नुभयो,' उनले इकागजसँग भने, 'प्रधानमन्त्रीले उहाँकै सुरक्षाका लागि नियन्त्रणमा लिएर उहाँकै घरमा राखिएको जानकारी दिनुभयो ।'

यसअघि विज्ञप्ति जारी गरेर देउवाले तत्काल रिहा गर्न सरकारलाई चेतावनी दिएका थिए । अन्यथा उत्पन्‍न हुने परिस्थितिको सामना गर्न तयार रहन पनि भनेका थिए । 'सरकारको यो निन्दनीय ब्यवहारको भत्सर्ना गर्दै तत्काल उहाँलाई रिहा गर्न, अन्यथा उत्पन्‍न हुने परिस्थिति सामनाका लागि तयार बस्‍न म सरकारलाई चेतावनी दिन चाहन्छु,' देउवाद्वारा जारी विज्ञप्तिमा भनिएको छ । 

तनहुँको जिल्ला ब्यास नगरपालिकाको वडा नं १ र ११ जोड्ने बुल्दी खोलामा कांग्रेसकै पालामा निर्माण सम्पन्‍न भएको पुल स्थानीय उपभोक्ता समितिले सर्वसम्मत रुपमा निर्णय गरेर उद्घाटन गर्न बोलाएपछि जाँदै गर्दा पौडेललाई प्रहरीले नियन्त्रणमा लिएको थियो ।

नगरपालिकाले निर्माण गरेको पुल उदघाटन कसबाट गराउने भन्‍ने विषयमा कांग्रेस र नेकपाबीच विवाद भएपछि स्थानीय प्रशासनले बुधबार मध्यान्ह १२ बजेबाट निषेधाज्ञा जारी गरेको थियो । तर कार्यक्रम निषेधाज्ञा जारी गरेको स्थलमा पौडेल कार्यकर्तासहित जान लागेपछि प्रहरीले बाटैबाट नियन्त्रणमा लिएको थियो ।