एमालेको ओली समूहले अन्तिम समयसम्म पार्टी एकताको प्रयास गर्ने

काठमाडौँ : नेकपा एमालेको अध्यक्ष केपी शर्मा ओली समूहले पार्टी एकताको प्रयास अन्तिमसम्म गर्ने भएको छ । केन्द्रीय समितिको तेस्रो दिनको बैठकमा अध्यक्ष ओलीले पार्टी एकताका लागि अन्तिम समयसम्म प्रयास जारी राख्‍ने बताएका हुन् । 

ललितपुरको च्यासलस्थित तुलसीलाल स्मृति प्रतिष्ठान भवनमा जारी केन्द्रीय समितिको बुधबारको बैठकमा बोल्दै ओलीले पार्टी एकताका लागि अन्तिम समयसम्म प्रयास जारी राख्‍ने बताएका हुन् । 'पार्टी एकताका लागि अन्तिम समयसम्म प्रयास जारी राख्‍ने प्रतिबद्धता अध्यक्ष ओलीले बैठकमा राख्नुभएको छ,' पार्टी प्रवक्ता प्रदीप ज्ञवालीले बैठकपछि सञ्‍चारकर्मीसँग भने, 'तर पार्टी आन्दोलनलाई घात गर्ने कुनै पनि खालका हर्कतलाई भने सफल हुन नदिइने अध्यक्ष ओलीले बताउनु भयो ।'

एमालेले पार्टी जीवनमा प्रतिकूल परिस्थिति आएको निष्कर्ष निकाल्दै त्यसबाट निराश नभई पार्टीको पक्षमा दृढतापूर्वक उभिन पनि सिंगो पार्टी पंक्तिलाई आह्वान गरेको छ । बैठकले जनताको पक्षमा काम गर्दै पार्टीलाई राष्ट्रिय राजनीतिको पूरानै अवस्थामा पुर्‍याउने, प्रतिपक्ष दलको हैसियतमा जनसरोकारका चासोलाई सम्बोधन गर्न सरकारलाई दबाब दिने गरी अघि बढने निर्णय गरेको प्रवक्ता ज्ञवालीले बताए । 

प्रतिकूल परिस्थितिमा पार्टी अध्यक्ष ओली नेतृत्वको सरकारले ४१ महिनामा राम्रो काम गरेको समीक्षा गर्दै धन्यवादसमेत दिएको छ । बैठकले भोली (बिहीबार) नेकपाका संस्थापक महासचिव पुष्पलाल श्रेष्ठको स्मृति दिवस तुलसीलाल स्मृति प्रतिष्ठानमै दिउँसा १ बजे मनाउने निर्णय पनि गरेको एमालेले जनाएको छ ।

तीन दिन देखि जारी एमाले केन्द्रीय समिति बैठक भोली पनि बस्‍नेछ ।