कर्णालीका नेताले भेटे प्रधानमन्त्री

काठमाडौं : कर्णाली प्रदेशबाट आएका नेताहरुले प्रधानमन्त्री केपी ओलीलाई भेटेका छन् । शनिबार दिउँसो बालुवाटारमा प्रदेश मुख्यमन्त्री महेन्द्रबहादुर शाही,  नेकपाका प्रदेश सह-इन्चार्ज प्रकाश ज्वाला तथा यमलाल कँडेल, सचिव मायाप्रसाद शर्मा, चन्द्रबहादुर शाही लगायतका नेताहरुले प्रधानमन्त्रीलाई भेटेका हुन् । 

प्रदेशका नेताहरुसँग प्रधानमन्त्री ओलीले प्रदेशमा देखिएको विवाद केन्द्रबाटै मिलाउने बताए । कर्णालीमा भएको विवादबारे केन्द्रमा छलफल भइरहेको र यस विषयमा छिट्टै केही निष्कर्ष निस्किनेसमेत प्रधानमन्त्रीले प्रस्ट पारे । 

नेकपाका अर्का अध्यक्ष पुष्पकमल दाहाल भने बालुवाटारको उक्त छलछलमा गएका थिएनन् । यसअघि शुक्रबार दाहालले आफ्नो निवास खुमलटारमा कर्णालीका नेताहरुसँग छलफल गरेका थिए ।

असोज १५ गते कर्णाली प्रदेशका सांसदहरुले मुख्यमन्त्री शाहीविरुद्ध अविश्वासको प्रस्ताव दर्ता गराएका थिए । सत्तारुढ दल नेकपाकै १८ जना सांसदहरुले अविश्वासको प्रस्ताव दर्ता गरेपछि त्यसको प्रभाव केन्द्रमा पनि देखिएको थियो ।

कर्णाली प्रदेशको विवाद अन्य प्रदेशमा पनि सर्ने देखिएपछि नेकपा हेडक्वाटरले प्रदेश नेतृत्वलाई केन्द्रमा बोलाएको थियो । २७ पत्र पठाएर हेडक्वाटरले प्रदेशका नेताहरुलाई केन्द्रमा बोलाएको हो ।

प्रदेशका नेताहरु २८ गतेदेखि काठमाडौं आउन थालेका हुन् । प्रदेशका असन्तुष्ट नेताहरुले प्रधानमन्त्री ओलीसामु गुनासाहरु पोखेको बैठकमा सहभागि एक नेताले जानकारी दिए । केन्द्रले गरेको निर्णय मान्न प्रदेश नेतृत्व तयार हुनुपर्ने प्रधानमन्त्री ओलीले प्रस्ट पारेका थिए ।