विवेकशीलका दुई पदाधिकारीसहित १३ नेता साझासँगको  एकीकरणमा नजाने

काठमाडौँ : विवेकशील नेपाली दुई पदाधिकारीसहित १३ नेता साझा पार्टीसँगको एकीकरणमा सहभागी नहुने भएका छन् । केन्द्रीय उपाध्यक्ष उपाध्यक्ष अजिता राई र कार्यालय व्यवस्थापन सचिव संगीता बाटाजु तथा ११ संघीय समिति सदस्यले एकीकरण प्रक्रियामा सहभागी नहुने बताएका हुन् । उनीहरूले बीहीबार विज्ञप्ति जारी गर्दै आफूहरू रवीन्द्र मिश्र नेतर्त्वको साझा पार्टीमा सहभागी नहने बताएका हुन् । 

एकीकरणमा जनाने घोषणा गरेका संघीय समिति सदस्यहरूमा कर्मा लामा तामाङ, छिरिंग तामाङ, विजयबाबु शिवाकोटी, जेसन वैद्य, शिशिर राई, जमाल अली, आशीष राई, ज्ञानेन्द्र निरौला, साधना थुलुङ्ग राई, शशिविक्रम कार्की र आलोक सुवेदी छन् ।

विवेकशील नेपाली पार्टीमा साझा पार्टीसँग पार्टी एकीकरण गर्ने कि नगर्ने भनेर सदस्यहरूबीच मतदान भएको थियो । मतदानमा बहुमत सदस्यहरूले साझा पार्टीसँग सहभागी हुने पक्षमा मतदान गरेका थिए । उनीहरूले एकीकरणमा जानेहरूलाई शुभकामना दिंदै आफूहरू त्यसमा सहभागी नहुने विज्ञप्तिमा उल्लेख गरेका छन् ।

 'विवेकशील नेपाली दलको हालको संघीय समितिमा सदस्य रहेका ३५ मध्ये दुई पदाधिकारी सहित हामी १३ जनाले विवेकशील नेपाली दल र साझाको आगामी यात्रामा सहभागी नहुने व्यहोरा जानकारी गराउँछौँ ,' विज्ञप्तिमा भनिएको छ।

विवेकशील एकीकरणमा सहभागी नभएका नेताहरूले आगामी दिनमा कसरी अगाडि बढ्ने भनेर छलफलपछि तय गर्ने बताएका छन् ।