प्रदेश सांसदको प्रश्न : मन्दिरमा सर्ने कोभिड-१९ रक्सी भट्टिमा सर्दैन ?

राजविराज  : प्रदेश २ का प्रदेशसभा सदस्य मोहम्मद समिमले चाडपर्वको बेला शक्तिपीठ र मन्दिरहरुमा लगाइएको निषेधाज्ञाको भर्त्सना गरेका छन् । उनले शनिबार विज्ञप्ति जारी गर्दै चाडपर्वमा सरकार र प्रशासनद्वारा गरिएको सो कार्यलाई धार्मिक आस्थमाथिको हस्तक्षेपको संज्ञा दिएका हुन् ।

सप्तरी निर्वाचन क्षेत्र ३ (क) बाट निर्वाचत उनले कोभिड-१९को संक्रमण रोकथाम तथा नियन्त्रण गर्न राज्यले निर्वाह गर्नुपर्ने भूमिकाभन्दा संघीय र प्रदेश सरकारले प्रतिकूल व्यवहार देखाउँदै आएको विज्ञप्तिमा भनिएको छ ।

‘जनता माझ कोभिड-१९ समस्यालाई सरकारले झन् भयावह बनाएर प्रस्तुत गर्दै आफ्नो कमी कमजोरी ढाकछोप गर्ने तथा सत्ता लम्ब्याउने षड्यन्त्र भइरहेको तथ्यवाट आमजनता अनभिज्ञ छैनन् ।’

एकातिर कोभिड-१९को भयावह अवस्थालाई देखाउँदै सनातन हिन्दू धर्मावलम्बीहरुको धर्म, परम्परा, संस्कार, आस्था र आत्मासँग जोडिएको दशैंजस्तो महान् पर्वको अवसरमा मठ-मन्दिर तथा शक्ति पीठहरुमा लामो निषेधाज्ञा लगाइएको र अर्कोतर्फ मदिरा पसल, होटेल तथा रेस्टुरेन्ट खुलै राखेको उनले आश्चर्य व्यक्त गरेका छन् । ‘बजार व्यवस्थित गर्न सकिएको छैन, यातायातको अवस्था पनि उस्तै छ । राजनीतिक दलहरूलाई पार्टी प्रवेशलगायतका कार्यक्रमहरु गर्न कुनै बन्देज छैन,’ उनले प्रश्न गरेका छन्‘के मन्दिरमा मात्रै कोभिड-१९ फैलिन्छ ? अन्य ठाउँको भीडभाडमा कोभिड-१९को प्रभाव शून्य हुन्छ र ?’

दशै हिन्दुहरुको पर्व मात्रै नभइ नेपालीहरूकै महान चाड भएको स्मरण गराउँदै दशैं जस्तो अवसरमा मठ-मन्दिरमा निषेधाज्ञा जारि गर्नु भनेको धार्मिक आस्था माथि प्रहार मात्रै नभई हजारौं गरीब विपन्नहरूको रोजीरोटीमाथिको हस्तक्षेप भएको पनि उनले प्रष्ट पारेका छन् । ‘मन्दिरमा फुल माला बेच्नेदेखि लिएर मन्दिर पुग्नेहरुको साईकलरमोटर साईकल पार्किङ गरेर राखिदिने जस्ता काममा लागेका हजारौं परिवारका लागि यो पर्व रोजगारको माध्यम पनि हो,’ उनले भनेको छन्-‘मुलुकमा कोभिड-१९ फेला परेको आठ महिना बितिसक्दा सरकार के गरेर बस्यो ?’