स्थानीय तहको अधिवेशन असोज ९ भित्र सक्ने एमाले निर्णय

काठमाडौँ - प्रमुख प्रतिपक्षी दल नेकपा एमालेले स्थानीय तहका कमिटीको अधिवेशनको तयारी गरेको छ । आज आइतबार तुल्सीलाल स्मृति प्रतिष्ठानमा बसेको स्थायी कमिटी बैठकले सबै स्थानीय तहको अधिवेशन असोज ९ गतेभित्र गरिसक्ने महासचिव ईश्वर पोखरेलले जानकारी दिए । 

बैठकपछि सञ्चारकर्मीसँग कुरा गर्दै पोखरेलले स्थायी कमिटी बैठक भोलि पनि बस्ने जानकारी दिए । उनले साउन २४ गते केन्द्रीय कमिटी बैठक बोलाउने निर्णय भएको पनि बताए ।  

त्यस्तै बैठकले साउन २३ गतेभित्र पार्टी सदस्यता नवीकरण र अद्यावधिक गर्न जिल्ला कमिटीलाई निर्देशन दिएको छ ।  भदौ २७ र २८ गतेका लागि तय गरिएको विधान अधिवेशन सम्पन्न गर्नका लागि सदस्यता नवीकरणलाई तोकिएको समयमै सम्पन्न गर्न सुझाव दिएको पोखरेलले बताए । त्यस्तै बैठकले  असोज ३ गते वडा तहको अधिवेशन गर्ने खाका तयार पारेको हो।