अब होटल व्यवस्थापन र पर्यटन विषय नेपालगञ्जमै पढ्न पाइने

काठमाडौँ - नेपालगञ्ज उपमहानगरपालिकाले होटल तथा पर्यटन अध्ययन प्रतिष्ठान (नाथम)का लागि एक विगाहा जग्गा दिने भएको छ । आइतबार उपमहानगरपालिकामा बसेको सर्वदलीय र सर्वपक्षीय बैठकले उपमहानगरपालिका वडा नं. १९ बासुदेवमा रहेको एक विगाहा जग्गा नाथमका लागि दिने निर्णय गरेको हो ।

यसअघि नै यो जग्गा उपमहानगरपालिकाले दिने तयारी गरेको थियो । तर स्थानीय मुस्लिम समूदायका मानिसहरुले मस्जिद बनाउने भन्दै सो ठाउँको जग्गा दिन इन्कार गरेका थिए । मेयर धवल शम्सेर राणाले नाट्टाका केन्द्रीय अध्यक्ष अच्युत गुरागाँई, नाट्टा बाँकेका अध्यक्ष श्रीराम सिग्देल, स्थानीय राजनीतिक दल, पर्यटन व्यवसायी र सरोकारवाला पक्षको बैठकले नाथमको भवन निर्माणका लागि जग्गा दिने निर्णय गरेको जानकारी दिए । यो निर्णयले कर्णाली र सुदूरपश्चिमको पर्यटन विकासका लागि दक्ष जनशक्ति उत्पादनमा ठूलो टेवा दिने उनको भनाइ छ । 

अब यो निर्णयसँगै कर्णाली र सुदूरपश्चिमको पर्यटन विकासका लागि दक्ष जनशक्ति उत्पादनको काम नाथमले थाल्नेछ । नाथमले होटल व्यवस्थापन तथा पर्यटन विषयमा तालिम दिने, स्नातक र स्नात्तकोत्तर तहको पठनपाठन गराउने र दक्ष जनशक्ति उत्पादन गर्ने गरेको छ ।

काठमाडौँको रविभवनमा केन्द्रीय कार्यालय रहेको नाथमले यस वर्ष झापाको बिर्तामोड, महोत्तरीको बर्दिबास र बाँकेको नेपालगञ्जमा प्रादेशिक कार्यालय खोल्ने निर्णय गरेको थियो । उपत्यका बाहिर नाथम कार्यालय खोल्न नाट्टा लगायका संस्थाले निरन्तर दबाब दिएका कारण नेपालगञ्जमा पनि कार्यालय खोल्ने निर्णय भएको नाट्टाका केन्द्रीय अध्यक्ष तथा नाथमका केन्द्रीय सदस्य अच्युत गुरागाईले जानकारी दिए ।

उनका अनुसार अब नाथमले भदौ असोजदेखि नै तीन देखि ६ महिनासम्मका पर्यटन सम्बन्धि तालिमहरु सञ्चालन गर्नेछ । यससँगै पश्चिम नेपालको पर्यटन विकास, दक्ष जनशक्ति उत्पादन, पर्यटन विकासका लागि आवश्यक पर्ने तालिम तथा सीप र पर्यटन व्यवसायीलाई पनि ठूलो राहत हुने नाट्टाका केन्द्रीय अध्यक्ष गुरागाईले बताए । 

यस्तै नाट्टा बाँकेका अध्यक्ष श्रीराम सिग्देलले पश्चिम नेपालको पर्यटन विकासमा नेपालगञ्जमा स्थापना हुने नाथमले धेरै काम गर्न सक्ने बताए ।

‘नेपालगञ्जमा नाथमको कार्यालय खोल्नु नै ठूलो कुरा हो’ उनले भने, ‘अब जनशक्ति उत्पादन, पर्यटन विकास र नयाँ नयाँ सम्भावनाबारे सरकारकै स्वामित्वमा रहेको नाथमबाट हुनेछ । यसका लागि नेपालगञ्ज उपमहानगरपालिका, पर्यटन व्यसायी, राजनीतिक दल, नाथम, नाट्टा लगायत केन्द्रीय पर्यटन सरोकारवाला सबैलाई धन्यवाद छ ।’

पर्यटन व्यवसायीको जोडबलमा सरकारले नाथम स्थापना गरेपनि काठमाडौँमा सीमित हुँदा धेरैजसोलाई पर्यटन विषय पढ्न राजधानी आउनुपर्ने बाध्यता थियो । तर पछिल्लो समय धेरैजसो निजी कलेजले होटल व्यवस्थापन र पर्यटन विषय पढाउन थालेपछि नाथम पनि प्रादेशिक स्तरमा जान तयार भएको हो ।