दार्चुला घटनाः छानबिन टोली धनगढी फर्कियो

कैलाली – दार्चुला घटनाको छानबिन गर्न गृह मन्त्रालयले खटाएको सहसचिव जनार्दन गौतम नेतृत्वको टोली दार्चुलाबाट बैतडी हुँदै आज धनगढी आइपुगेको छ । घटनाको छानबिन गर्न गठित समितिले अहिले सुदूरपश्चिमका आन्तरिक मामिला तथा कानुनमन्त्री पूर्ण जोशीसंग छलफल गरिरहेको छ ।

दार्चुलाबाट सोमबार फर्किएको टोली मंगलबार बैतडी पुगेको थियो । सरकारले छानबिन समितिलाई सुरुमा १० दिनभित्र प्रतिवेदन बुझाउन समय दिएकोमा हिजो मात्रै थप सात दिनको म्याद दिएको छ ।  साउन १५ गते महाकाली नदीमा तुइन तर्ने क्रममा एसएसबीले डोरी फुकाइदिएपछि खसेर महाकाली नदीमा खसेर जयसिंह धामी बेपत्ता भएका थिए ।

सहसचिव गौतम नेतृत्वको छानबिन टोलीमा सुदूरपश्चिम प्रदेश प्रहरी कार्यालयका प्रमुख प्रहरी नायब महानिरीक्षक पुरुषोत्तम कँडेल, राष्ट्रिय अनुसन्धान विभागका निर्देशक हुतराज थापा, सशस्त्र प्रहरी बलका प्रहरी वरिष्ठ उपरीक्षक सुरेशकुमार श्रेष्ठ र दार्चुलाका सहायक प्रमुख जिल्ला अधिकारी ज्योत्सना भट्ट रहेका थिए ।