यस्ता छन् श्वेताका दुलाहा

काठमाडौं: अभिनेत्री श्वेता खड्काले आज धनगढीका विजयेन्द्रसिंह रावतसँग विवाह गर्दैछिन् । अभिनेता श्रीकृष्ण श्रेष्ठको असामयिक निधनपछि ६ वर्षदेखि एक्लै रहेकी श्वेताले आइतबार मात्र आफूले दुःखको अध्याय बन्द गरेर सुखको अध्याय सुरु गर्न लागेको बताएकी थिइन् ।

उनले दोस्रो अध्यायका लागि छानेको केटा कस्ता होलान् धेरैलाई जिज्ञासा थियो । विवाहको दिन बिहानैदेखि सामाजिक सञ्जालमा श्वेता र विजयेन्द्रका प्रिवेडिङ फोटो सार्वजनिक भएका छन् । धनगढी मूल घर भएका विजयेन्द्र व्यापारी हुन् । धनगढीमा उनको परिवारको रेष्टुरेन्ट र फनपार्क रहेको बुझिएको छ । 

गोकर्ण फरेस्ट रिसोर्टमा आज भइरहेको वैवाहिक समारोहमा श्वेताले परिवारको परिवार मात्र उपस्थित रहने चर्चा छ । उनले विवाहपछि आउने प्रतिक्रियालाई मध्येनजर गरेर मात्र रिसेप्सन दिने कि नदिने निर्णय गर्न लागेको उनी निकट स्रोतले बताएको छ । 

‘कहाँ भेटिएला’ फिल्मबाट नेपाली फिल्ममा प्रवेश गरेकी श्वेताले आधा दर्जनभन्दा बढी सिनेमामा अभिनय गरेकी छिन् । ‘कान्छी’ नामक सिनेमा निर्माण गरेकी श्वेता पनि हस्पिटालिटी बिजनेसमा संलग्न छिन् । उनले काठमाडौंमा कफी सप र होटल चलाउँदै आएकी छिन् ।